Kuntug‘mish” dostoni tilida leksik-frazeologik va paremiologik madaniy birliklar lingvopoetikasi mavzusidagi

Tadqiqotning ilmiy va amaliy ahamiyati. Ushbu tadqiqot natijalari ilmiy, ham amaliy ahamiyatga ega. Masalan: Ushbu dissertatsiyada “Kuntug‘mish” dostoni tilining lingvostilistik xususiyatlarini o‘rganilishi, o‘zbek tilidagi boshqa dostonlar manbalarini ma’lum bir aspektda o‘rganish uchun asos bo‘lib xizmat qilishi mumkin.
Bundan tashqari, tadqiqot natijalari asosida aniqlangan va o‘zbek xalq dostonlari tilida qo‘llanilgan leksik manbalar o‘zbek dostonlari matnini lingvostilistik usulda o‘rganishning muayyan yo‘llarini ko‘rsatib berishga xizmat qilish va o‘zbek lingvofolkloristikasiga oid ilmiy tadqiqotlar yaratilishida asosiy manba bo‘lib xizmat qilishi mumkin.
Shu bilan birgalikda to‘plangan manbalardan o‘zbek tilshunosligining uslubshunoslik, nutq madaniyati, badiiy matnning lisoniy tahlili va boshqa sohalarga oid tanlanma kurslar, seminarlar tashkil qilish va amaliy mashg‘ulotlar uchun o‘quv qo‘llanmalar yaratish ham mumkin.
Tadqiqot metodologiyasi va tadqiq usullari. Dialektikaning bilish nazariyasi va O‘zbekiston Respublikasi birinchi prezidenti I.A.Karimovning milliy-ma’naviy qadriyatlarimizni, xalqimiz tarixini yanada chuqur o‘rganish va ona tilimizning ravnaqi masalasidagi qarashlari tadqiqotning metodologik asosi hisoblanadi. Shuningdek, V.Vinogradov, A.Yefimov, R.Qo‘ng‘urov, Yo.Tojiyev, E.Begmatov, B.O‘rinboyev, N.Mahmudov, A.Nurmonov, M.Mukarramov, A.Mamajonov, S.Karimov, B.Yo‘ldoshov va boshqa tilshunos olimlarning asarlar tilini lingvopoetik yo‘nalishda o‘rganish sohasida olib borgan ishlari ham tadqiqot uchun nazariy-metodologik manba vazifasini bajaradi.
Shundan kelib chiqib mazkur magistrlik dissertatsiyasi oldiga qo‘yilgan masalalarni quyidagi metodlar asosida yechishga harakat qilindi:
-nazariy jihatdan - o‘zbek tili stilistikasi, qisman o‘zbek adabiyotshunosligida dostonlar lingvopoetikasi muammolariga oid olib borilgan asosiy tadqiqotlarni o‘rganish va tahlil qilish;
-amaliy jihatdan – “Kuntug‘mish” dostoni matniga leksiografik ishlov berish, kompyuter dasturlari yordamida so‘z, so‘z birikmalari, paremiologik birliklar, gaplarning elektron versiyalarini yaratish va shu asosda xalq og‘zaki ijodiga, xususan dostonlar uslubiga xos bo‘lgan til birliklarining poetik sintaksis vositalarini aniqlash. Doston tilida qo‘llanilgan paremiologik birliklarning semantik va sintaktik xususiyatlarini tadqiq qilish.