Кичик гуруҳ (3-4 ёш)

Ҳиссий ривожланиш. “Мен” концепцияси ёки ўз-ўзини англаш. 
Болага ўз исмини ўргатиш, муомалада доимо унинг исмидан фойдаланиш. 
Кичкинтойни чақирганда қараши, ўз исмини эшитганда имо-ишора ва 
товушлар билан жавоб қайтаришини рағбатлантириш. 

---

19 
Болага тана аъзоларини кўрсатиш ва бир вақтнинг ўзида номини 
айтиш, катталарнинг “қани?” деган саволига тана аъзолари (боши, қўллари, 
оёқлари, бурни)ни кўрсатиб жавоб беришга ўргатиш.
Бола катталарнинг имо-ишорасига тақлид қилганда унинг 
ҳаракатларини табассум билан рағбатлантириш, турли ўйинларни кўзгу 
рўпарасида ўйнашини таъминлаш. Боланинг ўзига эътибор қаратиш учун 
қилган ҳаракатларига мувофиқ муносабат билдириш, унга ўз истакларини 
тушунтиришига изн бериш ҳамда эҳтиёжларини қўллаб-қувватлаш. 
Кичкинтойнинг ҳар бир эришган ютуғини мақташ ва маъқуллаш. 
Бола билан ўйнаётганда, унинг ўзига бўлган ишончини ошириш учун унга 
яқинроқ туриш ва бирга бажараётган ҳаракатларни изоҳлаб бериш. 
Ҳиссий ифодалаш. Боланинг ўзи хоҳлаган нарсага эришганда 
завқланиши, ҳиссиётлар билдирилганда жавоб қайтариши; юришни 
бошлаётганда маъқуллашларга жавобан жилмайиши; атрофдагиларнинг 
кулгисини уйғотган ҳаракатларга тушуниб ўз ташаббусига кўра 
такрорлаши, уларнинг эътиборини сезиб чапак чалиши, хурсанд бўлиб 
қувониши; узоқроқ турган буюмга етиб олишга қаттиқ интилиши ва 
ниҳоят етиб олганида мамнун бўлишини рағбатлантириш. 
Бола ёқтирадиган буюмни ундан олиб қўйилганда норозилик 
билдирса уни юпатиш ва эътиборини бошқа нарсаларга қаратиш. 
Кичкинтойга мунтазам равишда куй-қўшиқ эшиттириш, хиргойи 
қилиш, қарама-қарши кайфиятли (қувноқ-сокин, тез-аста) мусиқага 
нисбатан ҳиссий муносабат билдиришга ўргатиш, айрим ҳаракатларига 
нисбатан ижобий ёки салбий фикр билдириш (хурсанд бўлиш ва табассум 
қилиш ёки хафа бўлиш ва қош-қовоғни солиш). 
Болага қизиқарли йўллар билан турли ҳис-туйғулар ва ҳаракатларни 
билиб олиши (ҳар хил вазиятларда боланинг ҳиссиётларини айтиш)га 
имконият бериш ва ҳиссиётларини намойиш этишини қўллаб-қувватлаш, 
руҳий жиҳатдан қулай шароит яратиш ва ҳар куни биргаликда ўйнаш.