Кичик гуруҳ (3-4 ёш)

 
Бадиий адабиёт. Бадиий асарлар орқали боланинг ҳис-туйғуларини, 
эшитиш, тинглаш кўникмаларини таркиб топтиришда давом этиш. 
Болага ухлатаётганда доимий равишда “Алла” қўшиғини куйлаш. Уйғоқ 
пайтида эркаламалар (“Юлдузим, қундузим...”, “Сув келади ғози 
билан...”) айтиб қувонтириш; йиғлаганида овутмачоқлар (“Шу ўғлимга 
не бўлибди...”) айтиб, болани бағрига босиш, бошини, юз-қўлларини, 
орқа-белини силаб-сийпалаб тинчлантириш; кичкинтойдаги илк 
ўзгаришларни олқишловчи (“Икки тишингдан айланай...”, “Ўтирсин-о, 
ўтирсин...”, “Той-той болам...”) қўшиқларни хиргойи қилиш; болага 
жажжигина шеърлар, ўзи ҳақида қисқа эртак ва қувноқ ҳикоячалар
сўзлаб бериш; болани парваришлаш жараёнида, кийинтираётганда 
(“Муборак бўлсин...”, “Ёқаси мойли бўлсин...”), ювинтираётганда 
(“Оймома илла...”, “Сув пок...”) халқ қўшиқларидан фойдаланиш орқали 
кайфиятини кўтариш, ижобий ҳисларни тарбиялаш. 
Бола билан биргаликда ёрқин рангдаги чиройли расмли китобчаларни
томоша қилиш, содда, қизиқарли ҳикоя ва эртакларни ифодали тарзда ўқиб 
бериш ва унинг тинглашини рағбатлантириш.
Йил охирида бола: 
- янги сўзларга осонлик билан тақлид қилади, яқин одамларининг 
овозини танийди, ўз исмини эшитганда жавоб қайтаради, таниш 
буюмларни кўрсатади;
- чақирилган томонга ўгирилиб қарайди; 
- оддий саволларга “ҳа” , “йўқ” деб жавоб бериш учун бошини 
силкитади; “йўқ” сўзининг маъносини билади; 
- сўзларнинг биринчи бўғинларини ҳамда оддий сўзларни айтади; 
- катта ёшдагилар билан мулоқот қилишга интила бошлайди; 
- чиройли расмлар билан безатилган китобларни томоша қилади; 
- халқ қўшиқлари, қувноқ шеърлар, қисқа ҳикоя ва эртакларни
тинглайди; 
- китоблар, кўчадаги плакатларга нисбатан қизиқиш билдиради. 
 
Билиш жараёни ва атроф-муҳит тўғрисидаги 
билимларга эга бўлиш