Жонингизга жон бўлай жонимга дармоним отам. Камтарин пиру бадавлат шавкатим шоним отам

33. Она юрт Ўзбекистон
Созлар чалиб куйласам, мадҳинг адо бўлмағай,
Дунё кезиб изласам, ўхшашинг топилмағай.
Бу дунёнинг жаннати, сенсиз кўнглим тўлмағай,
Она юрт Ўзбекистон – олтинга топилмағай.

Гуллаган водийларинг гўзалликка андоза,

Самарқанду Бухоро кенг дунёга овоза.
Ерда ҳуру паридек қизларинг гул-гул, тоза,
Ўғлонларинг мард эрур, номардга сотилмағай.

Жидда, Тоиф, Мадина, Маккада ҳам кутган бор,

Душанбеда жон бериб, Aфғонда қон ютган бор,
Турку Ҳинду Қашқарда кўзи очиқ ўтган бор,
Ватан дея ўлса ким, тупроғи соврилмагай.

Олисдаги юртдошлар сенга қулоқ тутмоқда,

Босқинчилар етказган жароҳатлар битмоқда,
Ўғлонларинг, қизларинг истиқлол деб чиқмоқда,
Иймони пок элимнинг йўллари боғланмагай,
Она юрт Ўзбекистон – олтинга топилмагай.
34. Қайда кўрганман сени
Қараб тўймасман кўзингга, қайда кўрганман сени,
Ҳеч ишонмасман ўзимга, қайда кўрганман сени?

Ҳеч ишонмасман кўзимга, қайда кўрганман сени,

Қараб тўймасман юзингга, қайда кўрганман сени?

Бу келишган қоматинг-у, қошларинг менга таниш,

Юракларни ўйнатувчи кўзларинг менга таниш.

Дилга илҳом бахш этувчи юзларинг менга таниш,

Билолмасдан лолдирман, қайда кўрганман сени? {х2}

Бул қаро қош, кипригу-кўз бизни чорлайди нечун,

Энди билдим, қараб турган қаро кўзларнинг кучин.

Кетолмайман шул учунми, айтақолгин не учун?

Қийнамасдан айт, дилбарим, қайда кўрганман сени?

Қийнамасдан айт, гўзал қиз, қайда кўрганман сени?

Ҳеч ишонмасман кўзимга, қайда кўрганман сени?
35. Сочингдаги оқ
Гулдек қовжирабди қирмизи дудоқ,
Оҳ, бу ўшал таниш дил тортар нигоҳ.
Бой берилган ишқдан қолган эсдалик,
Менинг севгим эмасми сочингдаги оқ?

Aнча тўлишибсан, ўзингни ташлаб,

Унутдингми бизни, янгидан бошлаб?
Нега кулаябсан кўзингни ёшлаб,
Менинг севгим эмасми сочингдаги оқ?

Булбуллар чаҳ-чаҳлаб, ҳамон тонг отар,

Турналар қур-қурлаб қанотин қоқар,
Иккимизни тунлари қон-қон йиғлатар,
Сенинг севгинг эмасми сочимдаги оқ?

Иккимизни тунлари қон-қон йиғлатар,

Сенинг севгинг эмасми сочимдаги оқ?

Қанча йўллар ўтди, босилган довон,

Энди сен бегона, мен бошқа одам.
Aсли душманимиз сўнгги пушаймон,
Бизнинг севгимасми сочлардаги оқ?

Aсли душманимиз сўнгги пушаймон,

Бизнинг севгимасми сочлардаги оқ?
Пок дилдан қаро сочга ёзилган достон,
Бизнинг севгимасми сочлардаги оқ?

Гулдек қовжирабди қирмизи дудоқ,

Оҳ, бу ўшал таниш дил тортар нигоҳ.
Бой берилган ишқдан қолган эсдалик,
Менинг севгиммасми сочингдаги оқ?