+ишло+ хыжалик ишлаб чи+ариш фондлари ва

Табиий шароит-муайян ҳудуднинг ер усти тузилиши, яъни релъефи, иқлими, ички сувлари, тупроқ, ўсимлик ва ҳайвонот дунёси.
Техника экинлари-маҳсулоти саноат учун хом ашё сифатида ишлатиладиган экинлар. Техника экинлари толали, мойли, қандли, доривор ва бошқа ўсимликликларга бўлинади. Толали экинларга пахта, узун толали зиғир, каноп, сизаль; мойли экинларга кунгабоқар, ерёнғоқ, соя; қандли экинларга шакарқамиш, қанд лавлаги; доривор ўсимликларга женьшень, валерианка ва бошқа ўсимликлар киради. Техника экинлари тушунчаси шартли бўлиб, улар бир қатор саноат тармоқлари - тўқимачилик, ёғ-мой, шакар-қанд ва бошқа тармоқлар учун қимматли хом ашё етказиб беради.
Токчилик-аҳолини узум ва узум маҳсулотлари билан таъминлашда муҳим ўрин тутадиган тармоқ. Унинг асосий мақсади аҳолини янги, хўраки узум ва майиз, вино саноатини хом ашё билан таъминлашдан иборат. Узум жаҳон миқёсида Жанубий Европа, Кичик ва Ўрта Осиё, Кавказ мамлакатларида энг кўп етиштирилади. Узумнинг ялпи ҳосили бўйича Италия, Франция, Испания, Туркия энг олдинги ўринларни эгаллайди. Ўзбекистонда ҳам токчилик қадимий тармоқлардан бири. Фарғона водийси, Самарқанд ва Тошкент вилоятларида ривожланган.
Толали экинлар-газлама ва тўқимачилик маҳсулотлари ишлаб чиқариш учун хом ашё берадиган экинлар. Толали экинларга ғўза, жут, зиғир ва наша киради. Улардан айниқса, пахта билан узун толали зиғир қимматбаҳо тола берувчи экинлар бўлиб, муҳим иқтисодий аҳамиятга эга.
Тупроқ-литосфера(ер пўсти)нинг энг устки, унумдорлик хусусиятларига эга бўлган ва ўсимликлар ўса оладиган қатлами.
Тупроқ бонитировкаси-ер ресурсларини сифат жиҳатдан қиёсий баҳолаш. Тупроқ бонитировкаси тупроқ ҳосилдорлигига қараб белгиланади ва одатда 100 балли шкала асосида амалга оширилади. Ўзбекистонда бонитировка асосини пахта ҳосили ташкил этади.
Туячилик-чорвачиликнинг йирик ва қадимий тармоқларидан бири. Туя чўл, чала чўл ва қуруқ дашт зоналарининг иссиқ иқлимига мослашган. Туячилик тропик ва субтропик чўл ва чўл зоналарида етакчи ўрин тутади. Қумли саҳроларнинг асосий транспорт ҳайвони туя ҳисобланади. Туячилик Осиё ва Африка мамлакатларида жуда яхши ривожланган.