I-чет эл валютаси бўйича биржа савдоларига оид саволлар

4. “Банк сири” тушунчаси қайси қонун ҳужжатларида кўрсатилган ҳамда унинг моҳияти нималардан иборат?
Ўзбекистон Республикаси Фуқаролик кодексининг 786-моддасида ва Ўзбекистон Республикаси “Банк сири тўғрисида”ги Қонунда банк сири тушунчаси берилган. Банклар мижозларнинг ҳисоб рақамларини, банк қўйилмаларини, операцияларини ва мижоз ҳақидаги маълумотларни сир сақлашини кафолатлайдилар. Банк сири ҳисобланган маълумотлар фақат мижозларнинг ўзларига ёки уларнинг вакилларига берилади. Давлат органлари ва уларнинг мансабдор шахсларига бундай маълумотлар фақат қонунда кўрсатилган ҳоллардагина берилади. Банк томонидан мижознинг банк сири маълумотлари ошкор қилинган ҳолларда, ҳуқуқи бузилган мижоз банкдан етказилган зарарни қоплашини банкдан талаб қилишга ҳаққи бор.


5. Ўзбекистон Республикаси “Банк сири тўғрисида”ги Қонун қачон қабул қилинган ва қандай маълумотлар банк сири ҳисобланади?
Ўзбекистон Республикаси “Банк сири тўғрисида”ги Қонун 2003 йил 30 августда қабул қилинган
Мазкур Қонуннинг 3-моддасига мувофиқ банк сири банк томонидан муҳофаза қилинадиган қуйидаги маълумотлардан иборатдир:
ўз мижозларининг (вакилларининг) операциялари, ҳисобварақлари ва омонатларига доир маълумотлар;
банк ўз мижозига (вакилига) банк хизматлари кўрсатиши муносабати билан мазкур мижоз (вакил) тўғрисида олган маълумотлар;
мижознинг (вакилнинг) банк сейфлари ва биноларида сақлаб турилган мол-мулки, унинг хусусияти ва қиймати ҳақидаги маълумотлар;
мижоз (вакил) топшириғига биноан ёки унинг фойдасини кўзлаб амалга оширилган банклараро операциялар ва битимлар тўғрисидаги маълумотлар;
банк сирини ташкил этувчи маълумотларнинг банклар ўртасида муомалада бўлиши натижасида маълум бўлиб қолган, бошқа банкнинг мижозига (вакилига) доир маълумотлар;
жамғариб бориладиган пенсия тизимининг иштирокчилари, пенсия бадалларининг миқдори ва суммаларининг ҳаракати, фуқароларнинг шахсий жамғариб бориладиган пенсия ҳисобварақларидаги пенсия жамғармалари тўғрисидаги маълумотлар.