Hayot charxpalagi

SEVGI NIMA

Sevgi nima o'zi, ayting, sevganlar

To'lqin-la mavj urgan sehrli ummonmi.

Quyoshmi, oymi, yulduzmi ayting

Ikki qalb makoni yettinchi osmonmi.

Bu tuyg'u asli nedan yaralgan

Kechasi farishta solami qalbga

Yo yomg'ir misoli mayda-maydalab

Har tomchi jo'sh urib, yog'ami qalbga.

Sevgi nima o'zi tushdagi tushmi

Orzular og'ushi tuyilgan hayolmi.

Mard, jasur erkak-u, mehrga to'la

Timsoli: muqaddas, vafoli ayolmi.

Bebaho gavhardir, nozik, xushbichim

Ko'zni quvontirgan hiloldir sevgi.

Yulduz-u falakdir, jahon ul afsun

Dillarni rom etgan biloldir sevgi.

Kechasi uxlolmay, ko'zlar intizor

Yorni oy aksida ko'rgan tunimdir.

Orazin bezagan xunrez ko'zlari

Tushimda jon olib, o'lgan kunimdir.

Asl yor ishqida kuygan Mashrabdek

Bedilman, kundan kun seni suyguvchi

Ishqim yurakdadir, yuragim senda

Jahonso'z hajringda hamon kuyguvchi.

Sevgi bu— hayotdan zavqlanib, har kun

Uzoq umr ko'rib, yuzga to'lishdir.

Yettinchi osmonda umrbod qolib

Suyukli yor bilan baxtli bo'lishdir.

VATAN

Allalar aytgan onamsan, vatan

Dunyolar ichida birdonamsan, vatan

Jaloliddinday yetuk mardonamsan, vatan.

Jonim baxshidadur o'zbegim, vatan

Ostonadan boshlangan oilamdursan,

Zulfiyadek buyuk shoiramdursan,

Nay, rubob, jarangdor doiramdursan,

Jonim baxshidadur o'zbegim, vatan.

Navoiydek yetuk g'azal sultonim,

Boburdek shoir-u, shohijahonim,

Mashrabdek ishq yutgan jo'shqin ummonim,

Jonim baxshidadur O'zbekistonim.

Qushlarni sayratgan go'zal bo'stonim,

Hushbo'y hid taratgan shod gulistonim,

Tarixda yozilgan g'azal, dostonim,

Jonim baxshidadur O'zbekistonim.

Vatanni sevuvchi tanim, iymonim,

Nomusim, orim va pok vijdonim,

Allohning so'zlari buyuk Qur'onim,

Jonim baxshidadur O'zbekistonim.

Dilimdan chiqayotgan dilkash kalomim,

Insonni shod etgan shirin salomim,

Namozin ulug'lagan pok musulmonim,

Jonim baxshidadur O'zbekistonim.

Mustahkam qal'ali O'zbekistonim,

Qo'riqlaydi yurtni jasur posbonim,

Qo'rqmas, mehribon-u jannatmakonim,

Jonim baxshidadur O'zbegim, vatan.

Har tongda chiquvchi nurli quyoshim,

Kulguyim, qayg'uyim, hamda ko'zyoshim,

Oldinga boshlovchi ulug' yurtboshim,

Jonim baxshidadur O'zbekistonim.

Shu yurtda tug'ildim, shu yurtda o'sdim

Barcha yaqinlarim, yonimda do'stim,

Mehr berganlarga qo'limni cho'zdim,

Jonim baxshidadur o'zbegim, vatan.

Ishonching oqlaymiz ulug' maakanim,

Faxr-la kuylaydi vujudim, tanim,

Osmoni musaffo vatanim manim,

Men seni sevaman, O'zbekistonim!