Hayot charxpalagi

JANNATIM ONAM

Ilk allam kuychisi, ko'zimning nuri,

Hayotim mazmuni, so'zimning duri,

Ona vatan, yuksak yurtning g'ururi,

Tunlari bedorim, jannatim onam.

Tandirdan uzilgan issiq nonimsiz

Ilk so'z-qadamim, hurijahonimsiz,

Butun vujudim, tandagi jonimsiz

Tunlari bedorim, jannatim onam.

Siz bog'dirsiz, men undagi gulman

Mevali daraxtsiz, shohida bulbulman

Shamshodsiz, sarvsiz, hurman, sunbulman

Tunlari bedorim, jannatim onam.

Ko'nglimda ne bo'lsa, ayttirmay sezgan

Hasratin bildirmay bag'rida ezgan

Umrimning yo'lini mehr-la chizgan

Tunlari bedorim, jannatim onam.

Siqilsam bag'riga bosguvchim bo'ling

Yiqilsam turg'azib qo'yguvchim bo'ling

Azobni kulguga yo'yguvchim bo'ling

Tunlari bedorim, jannatim onam.

Yuzimda eng shirin kulguchim bo'ling

Hamisha yonimda turguvchim bo'ling

Taxtimni, baxtimni ko'rguvchim bo'ling

Tunlari bedorim, jannatim onam.

Farzandlar baxtini ko'rsin pok ona

Ular ham girdida bo'lsin parvona

Duosin olaylik, aytib shukrona

Tunlari bedorim, jannatim onam.

Hech kimga o'xshamas yagonamizsiz

O'zbegim ayoli, durdonamizsiz

Alloh mo'jizasi, ne'mati onam

Davlatim otamning jannati onam.

Firdavsni netaman ko'klardan izlab,

Oyog'i ostida jannati onam.

Birisin oy bilsam, birisin quyosh

Davlatim otamning savlati onam.