Ёритиш электр

5.18. Ўтказгичларни қисман бикр резина найчалар ичида яширин ўтказиш

Қисман бикр найчаларда симларни икки усулда яширин ўтказиш мумкин:
Биринчи усулда ҳар бир сим алоҳида найчадан ёки битта найчадан бир неча сим ўтказилади. Сўнг найчалар, деворлар ва ораёпмаларда ҳосил қилинган ариқчаларга ётқизилади ва қоришма билан сувалади. Деворлар ва ораёпмаларда бир қават найча ётқизиш мумкин.
Иккинчи усулда трубалар ариқчаларга симсиз ётқизилади. Симлар найчалар ичига сувоқ ишлари тамом бўлгандан ва деворлар қуригандан кейин, найчалар ичидан олдиндан ўтказиб қўйилган 1,2–1,5 мм ли пўлат сим ёрдамида тортилади.
Симларни найчалардан ўтказиш осон бўлиши учун узун қутилардан фойдаланилади. Улар фақат иккита қўшни тармоқлаш қутиси орасидаги масофа 10 м дан ортиқ бўлгандагина ўрнатилади. Найчаларни ариқчаларга ётқазишдан олдин симларни найча ичидан ўтказишга йўл қўйилади, бунда симларни найчалар ичида ўтказиш анча соддалашади ва осонлашади.
Симларни қисман бикр резина найчаларда ёғоч ва ёньинга чидамиз бошқа юзалардан ўтказишда, найчалар тагига камида 5 мм қалинликдаги алебастр қоришмаси қатлами ёки қалинлиги камида 3 мм бўлган асбест картони ётқизилиши лозим. Алебастр қатлами ёки асбест картон найчанинг икки томонидан 10–20 мм чиқиб туриши керак. Найчалар деворга михларга ўралган рухланган сим ёрдамида маҳкамланади. Бу михлар шахмат тартибида қоқилади. Найчалар устидан сувоқ қатлами ётқизилади.
Найчаларни ғишт ва бетон деворларда ўйиб очилган, ариқчаларда ёки каналларда ётқизишда уларнинг устидан алебастр қоришмаси чаплаб қотирилади.
Қисман бикр резина найчалар уларнинг ташқи диаметридан 6–10 марта катта бўлган радиус билан қўлда эгилади. Найча эгилган қисмларининг бикрлигини ошириш учун шу қисмига изоляцияловчи лента ўралади, унинг устидан 1–1,5 мм ли рухланган симни спираль шаклида ўраб чиқилади, бу эса симни найчанинг ичидан ўтказишни осонлаштиради.
Найчалар учларининг герметиклигини таъминлаш учун учлари текис қилиб кесилади ва 30–40 мм ўлчамда қайноқ МБ битум массаси қуйиб қопланади. Сўнгра улар катта диаметрли ва узунлиги 100–120 мм ли резина труба бўлагидан тайёрланган муфта ичига киритилади. Муфтанинг учларига қуюқ битум массаси суркалади, туташтириладиган қисмнинг ҳаммаси икки қават изоляцияловчи ёки смолали лента изоляция устидан битум массаси қатлами суртиладию, резина найчаларнинг учларига, улар ташқарига чиқилган жойига втулка ёки воронка кийгизилади.
Ўтказгичларни яширин ўтказишда ўрнатиладиган узгичга ёки штепсель розеткасига туташтириш учун найчанинг учи симлари билан бирга қутига киритилади.