Экология ҳуқуқи предмети, методи ва тизими

Экологик назоратнинг ҳуқуқий ҳолати


Талаба мазкур мавзуда экологик назорат ҳуқуқий ҳолатининг тушунчаси, аҳамияти ва ўзига хос хусусиятлари, экологик назорат тизими ва мазмуни, давлат экологик назоратининг ҳуқуқий ҳолати, махсус ваколатли давлат органларининг ушбу соҳадаги ваколатлари, экология соҳасида идоравий ва ишлаб чиқариш назорати, экология соҳасида жамоат назорати ва унинг аҳамияти ҳақида маълумотларга эга бўлади.
Мавзуни тўлиқ ўзлаштириши учун ва ўзлаштираётган назарий билимни амалиёт билан боғлаш мақсадида қўйидаги масалаларни ечимини топиш мақсадга мувофиқ бўлади.


1-масала
Тошкент шаҳрида жойлашган кимё заводларидан бирида Табиатни муҳофаза қилиш давлат қўмитаси томонидан давлат экологик назорати амалга оширилди. Ушбу назорат амалга оширилгач, бир ойдан сўнг мазкур заводнинг зарарли таъсиридан шикоят қилиб фуқаролар заводда жамоат экологик назоратини ўтказиш талаби билан мурожаат қилишди. Бироқ, завод маъмурияти яқинда Табиатни муҳофаза қилиш давлат қўмитаси томонидан давлат экологик назорати ўтказилганлигини рўкач қилиб, фуқароларни завод ҳудудига киришига ҳамда жамоат экологик назоратини амалга оширишларига тўсқинлик қилди.
– Кимё заводи маъмуриятининг хатти-ҳаракатлари қонунийми?
– Давлат экологик назоратининг амалга оширилганлиги жамоат экологик назоратининг амалга оширилишига тўсқинлик қилувчи ҳолат бўлиб хизмат қилиши мумкинми?


2-масала
Самарқанд шаҳрида жойлашган цемент заводларидан бирида завод меҳнат жамоаси томонидан жамоат экологик назорати амалга оширилди ҳамда завод цехларидан бирининг ишчилар саломатлигига ҳамда атроф табиий муҳитга зиён етказаётганлиги туфайли ишни тўхтатиш тўғрисида хулоса берди. Бироқ, завод маъмуриятида ушбу масала муҳокама қилинганда бундай қарор завод фаолиятига жиддий салбий таъсир кўрсатиши таъкидланиб, жамоат назорати хулосаси талаблари рад этилди.
– Меҳнат жамоаси жамоат экологик назоратини амалга оширишга ҳақлими?
– Жамоат экологик назорати хулосасининг юридик кучи қандай баҳоланади?
– Завод маъмуриятининг хатти-ҳаракатлари қонунийми?