Экология ҳуқуқи предмети, методи ва тизими

_{Экология ҳуқуқи предмети, методи ва тизими}

Талаба мазкур мавзуда табиат билан жамият ўртасидаги ўзаро боғлиқликнинг асосий йўналишлари, Ўзбекистон Республикаси Президенти И.А.Каримов асарларида экологик хавфсизлик, атроф табиий муҳитни муҳофаза қилиш соҳасидаги муаммолар ва уларни ҳал этишга қаратилган ғоялар ва чора-тадбирлар, ҳуқуқ тизимида экология ҳуқуқининг тутган ўрни, экология ҳуқуқи тушунчаси ва ўзига хос хусусиятлари, давлатнинг экологик функцияси, Ўзбекистоннинг экологик сиёсати, экология ҳуқуқининг предмети, методи ва тамойиллари, экология ҳуқуқининг рвожланиш тарихи, экологик-ҳуқуқий муносабатлар тушунчаси ва асосий йўналишлари, экология ҳуқуқининг тизими, ҳуқуқий ислоҳот ва экология ҳуқуқи муаммолари, бозор иқтисодиётига ўтиш даврида экология ҳуқуқининг ўрни ва аҳамияти борасида маълумот олади. Ушбу йўналишларни тўлиқ ўзлаштириши учун ва ўзлаштираётган назарий билимни амалиёт билан боғлаш мақсадида қўйидаги масалалар таклиф этилмоқда.

1-масала
Тошкент шаҳрида жойлашган фармацевтика заводида фаолият юритувчи бош инженер А.нинг ҳаракатлари юзасидан қўзғатилган жиноят ишини кўриб чиқиш жараёнида Тошкент шаҳар жиноят ишлари бўйича судида унинг завод биносида инсон саломатлигига учун зарарли бўлган ҳавони ифлослантиришга оид қилмишини атроф табиий муҳитни муҳофаза қилиш қоидасини бузиш ёки меҳнатни муҳофаза қилиш қоидасини бузиш сифатида баҳолаш юзасидан савол туғилди.
– Ушбу иш юзасидан тушунтириш беринг?
– Завод биноси ҳудудидаги атмосфера ҳавосининг ифлосланиши қайси қонунчилик бўйича тартибга солинади?


2-масала
Фуқаролар М. ва Ж. Жиззах вилояти Зомин туманида жойлашган давлат қўриқхонасига тегишли рухсатнома асосида кириб, ушбу қўриқхонадан ёввойи какликни тутиб олишади ва белгиланган тартибда ҳақ тўлаб, қўриқхона ҳудудидан олиб чиқиб кетишади. Кейинчалик тутқунликда сақланаётган қушни фуқаро М. ўз қўшниси С.га сотади ҳамда С. қушни олиб кетаётган вақтда давлат табиатни муҳофаза қилиш ходимлари томонидан қўлга олинади ва С.га нисбатан ҳуқуқий таъсир чораси қўлланилишини маълум қиладилар.
– Фуқаро С.нинг ҳаракатларида табиатни муҳофаза қилиш қонунчилигини бузиш аломатлари борми?
– Табиатни муҳофаза қилиш ходимларининг талаби қонунийми?