Э. ҚОсимов, М. Aкбaров пaрдозбоп қурилиш aшёлaри

Ойна тахталардан ташкил топган пакетларнинг
асосий хусусиятлари
Кўпик-шиша. Кўпик-шиша енгил ва серғовакдир. Ундаги бир тартибда жойлашган юмалоқ ковакчаларнинг диаметри 0,1—0,6 мм бўлиб, улар ўзаро юпқа шиша девор билан ажралган.
Кўпик-шиша олиш учун саноатда чиқадиган шиша чиқиндиларини яҳши туйиб, унга газ ҳосил қилувчи қўшилмалар (кокс, оҳактош, мармар ва бошқалар) қўшилади, кейин уни 700—900°C да эритиб, қолипга қуйилади. Суюқлик ҳолатига ўта­ётган шиша эритмасида қўшилмалар газ ҳосил қилади ва қотиш жараёнида буюмда майда ковакчалар пайдо бўлади. Бу эса буюмнинг зичлигини, иссиқлик ўтказувчанлигини камайтиради.
Кўпик-шишанинг ғоваклиги 85—95%, зичлигини 200 дан 400 кг/м³ гача, иссиқлик ўтказувчанлик коеффициенти 0,08 дан 0,12 Вт/м град гача, сиқилишдаги мустаҳкамлиги эса 0,5—12,5 МПа гача бўлади.
Кўпик-шишадан ўлчамлари 1000500125 мм ёки 500500125 мм ли блок ва плиталар тайёрланади. Кўпик-шишани осон арралаш, кесиш ёки пармалаш мумкин. Ундан тайёр­ланган буюм совуққа ҳамда кимёвий эритмалар таъсирига чидамли бўлади.
Кўпик-шиша қурилишда кўп қатламли темир-бетон панелларда, темир-бетон, ғишт ва ёғоч тахта деворларда, поллар ва қа­ватлараро плиталарда иситгич қатлам сифатида ишлатилади. Сирти 400°C гача қи­зийдиган ускуна ва қу­вурларни қоп­лашда ҳам иссиқликни сақловчи ашё сифатида кўпик-шиша ишла­тилади.
Кўпик-шиша доналари жуда енгил ва конструктив бетонлар олишда енгил тўлдиргич сифатида ишлатилади. Кўпик-шиша тўлдир­гич шиша синиқларини чўян золдирли айланма тегирмонда кукун ҳолатгача туйилади ва доналанади. Кейин, айланма хумдонда кўпир­тириб эритилади. Кўпик-шиша тўл­диргичнинг уйилган ҳолатдаги зичлиги 100—150 кг/м³ га тенг.
Шиша тола — борсиликат ши­шасини юқори ҳароратда эритиб, диаметри жуда кичик (0,00002 дан 0,03 мм гача) тешикдан босим остида чиқаётган толаларни ғал­такларга ўраб олинади. Шиша толасини узлуксиз равишда олиш технологияси 5.4-расмда кўр­сатилган.
Шиша толасининг чўзилишдаги мустаҳкамлиги жуда катта (Р_чўз — 200...400 кг/мм² ёки 2000...4000 МПа). Толанинг диаметри кичрайиши билан унинг мустаҳкамлиги ҳам камаяди. Шиша толали буюмнинг зичлиги ҳамда иссиқлик ўтказувчанлик коеффициенти жуда кичик бўлади. Диаметри 0,04 мм гача бўлган шиша толасининг зичлиги 50 кг/м³ га тенг.
Шиша толасидан тайёрланган плита, скарлуп, намат ва шу кабилар қаватлараро плиталар, пардадеворлар, том ва ёпма плиталар қурилишида иссиқликни сақловчи сифатида кенг ишлатилади. Чигал ва жуда калта шиша толаларидан зичлаб олинган шиша наматни битум ёки смолаларга шимдириб олинган маҳсулот қурилиш конструк­сияларининг ер ости қисмини чиришдан сақлашда иш­латилади.