Э. ҚОсимов, М. Aкбaров пaрдозбоп қурилиш aшёлaри

Темир ашёлар

Aзиз ўқувчида савол туғилиши мумкин: — нега «темир ашё­лар» деб номланган, бошқа китобларда «металл материаллари» дейилганку? Дарҳақиқат шундай. «Темир рудаси» сўзи атамаларда расмий тан олинган. Бу дегани тоғ жинси хомашёсида темир моддаси борлигидан даракдир. Уни эритдик дейлик. Демак, хом­ашёдан темирни ажратдик ва «темир ашёси» ҳосил бўлди.

Бизнинг ота-боболаримиз «материал», «металл» демаган, балки «ашё», «темир» деб келганлар. Сўз атамаларида «ашёвий далил­лар» деган ибора бор. Шундай экан «хомашёвий далиллар» дейилмайди. Хомашё қайта ишлангандан кейин (пишириб, майдалаб, қориштириб ва ҳ.к.) уни ашё деб аташ асл маънони билдиради.
Биз муаллифлар «темирчи» устани «металлчи уста» дейиш нотўғри бўлади деган фикрдамиз.
Пардозловчи учун темир ашёларини билиш шартмикин? Биз шарт деб ўйлаймиз. Чунки, чўян, пўлат, алуминий ва рангли темирлардан пардозлаш ишларида кенг фойдаланилади.
Ўзбекистон темир саноати ва унинг пайдо бўлишига доир бой тарихга эга эмас. Бунга сабаб, бизнинг ер ости бойликларимизда темир рудасининг камлиги бўлса керак.
Ҳозирги вақтда темир ишлаб чиқариш саноати асосан қуйидаги технологияларга асосланган. Юқори ҳароратдаги тоғ жинси — рудани эритиб олинган суюқ темирни кислород билан қайнатиб юқори сифатли пўлат олиш; суюқ пўлатни вакуумлаш усулида сифатини ошириш; махсус хоссаларга эга бўлган юқори навли пўлат ва чўянларни олиш; самарали технология асосида нефелиндан алуминий олиш; прокат усули билан эгилувчан юпқа лентасимон пўлат ўрамалари олиш; суюқ пўлатни қолипларга (самарали усул билан) қуйиш; вакуумда диффузия усули билан пайвандлаш; пўлат бу темир қўшиб вакуумда қайта ишлаб (легирлаш); темир кукунини қайта ишлаш ва зичлаш каби бир қатор янги технологияларга асос­ланган темир саноати мавжуддир.
Углеродли темир эритмаларидан олинадиган ашёларга асосан пўлатни киритиш мумкин. Пўлат юқори ҳароратда эритилганда ёки совитилганда ундаги углероднинг камайиши ёки ошиши ҳисобига пўлатнинг хоссалари кескин ўзгаради. Эритма таркибида углерод миқдори 2% гача бўлса — пўлат, 2% дан ошса чўян деб аталади.