Э. ҚОсимов, М. Aкбaров пaрдозбоп қурилиш aшёлaри

Қоплама ёғоч-қиринди плиталар, одатда ёғоч буюмлар ишлаб чиқарадиган саноат чиқиндиси — ёғоч қиринди билан синтетик смолаларни қориштириб, кейин иссиқ холатда зичлаш усулида олинади. Қоришма таркибидаги ёғоч қиринди миқдори 88—92% ва органик боғловчи модда — смола миқдори эса 8—12% қилиб олинади.
Иссиқ-совуқни кам ўтказадиган ашё сифатида, кўпинча енгил ва ўртача ҳажмий оғирликдаги плиталар кўп ишлатилади (иссиқлик ўтказувчанлик коеффициенти 0,04—0,08). Зичлиги энг катта бўлган қоплама ёғоч қиринди плиталар биноларнинг ички қисмини пар­дозлашда, пардадевор сифатида кенг ишлатилади. Қоп­лама плитанинг эгилишга бўлган мустаҳкамлиги ишлатила­диган ёғочнинг жинсига ва плитанинг ҳажмий оғирлигига боғлиқ. Плитанинг эгилишдаги мустаҳкамлиги, одатда 3,5 МПа бўлади. Ёғоч-қиринди қоплама плиталарни механик асбоб ва ускуналарда ишлаш осон, яъни плитани арралаш, пармалаш ёки фрезерлаш йўли билан керакли буюмлар тайёрлаш мумкин. Ёғоч-қиринди қоплама плитанинг таннархи ёғоч-тола плитага нисбатан кам. Чунки, ёғоч-қиринди пли­танинг ишлаб чиқариш тех­нологияси бирмунча оддий­дир.
Иссиқ-совуқни кам ўтка­задиган пардозбоп полимер ашёлар. Иссиқ-совуқни кам ўтказадиган ашёлар, аввало енгил, етарли даражада мус­таҳкам ва техник шароитларга тўла жавоб бериши керак. Бу­ларга кўпик қатлам, серғовак қатлам, ари инисимон қатлам ва шунга ўхшашлар киради.
Серғовак ҳамда кўпик қатламлар қиздирилган смолаларни кўпиртириб, кейин қолипларга қуйиб тайёрланади. Полимерлардан олинадиган иссиқ-совуқни кам ўтказадиган ашёларнинг ҳажмий оғирлиги 10—220 кг/м³. Иссиқ-совуқ ва товушни ўтказмаслик кўрсаткичлари олинган маҳсулотнинг ҳажмий оғирлигига боғлиқ.
Полистирол, полихлорвинил ва полиефир смолалар асосида тайёр­ланадиган иссиқ-совуқни кам ўтказадиган кўпик қатлам плиталар қурилишда катта аҳамиятга эга бўлмоқда. Икки сирти сувга чидамли фанера билан ёпиштирилган пардозбоп кўприк-қатлам плита 9.1-расмда кўрсатилган. Бундай плиталар республикамизда ишлаб чи­қарилмоқда.
Кўпик ва серғовак қатламли қоплама ва пардозбоп плиталар иссиқ-совуқни ўтказмаслик даражаси бўйича қалинлиги 2,5 ғиштли деворлар ўрнини боса олади.