Е. Б. Бабский, А. А. Зубков, Г. И. Косицкий, Б. И. Ходоров

Химиявий таъсир этиш. Марказий нерв системасининг функцияларини ўрганиш учун химиявий таъсир этиш методикасини биринчи марта И. М. Сеченов ўзининг классик тажрибасида татбиқ этган ва кўрув дўмбоқлари соҳасига NаС1 кристалини қўйиб таъсир этилганда спинал рефлекслар тормозланишини исбот этган.
Орқа мия билан бош миянинг турли қисмларига химиявий таъсир этиш учун кўп тадқиқотларда ҳар хил моддалар, масалан, тириштирадиган моддалар, наркотиклар ва шу кабиларнинг маҳаллий таъсиридан фойдаланилади. Нейрофизиологик тадқиқотларда локал стрихнизация методикаси айниқса кенг қўлланилади.
Шу мақсадда сатҳи бир неча квадрат миллиметр келадиган бир парча фильтр қоғозини стрихнин эритмасига ҳўллаб, миянинг очилган юзасига қўйилади ёки шу эритмадан бир томчиси пўстлоқ остидаги ядроларга ёки мия стволига киритилади. Стрихнин тормозловчи синапсларни заҳарлаб қўяди , шунга кўра афферент импульсларга жавобан рефлектор реакциялар кескин даражада ошади. Дюссер-де-Баренн сенсор функциялар локализациясини аниқлаш учун стрихнизация методикасини татбиқ этган. Катта ярим шарлар пўстлоғининг муайян бир қисми заҳарланганда ёки стрихнин эритмаси кўрув дўмбоқларининг турли қисмларига киритилганда миянинг стрихниндан заҳарланган қисмларига импульс юборадиган тери бўлакларида тактил сезгирлик ошади.
Сўнгги йилларда марказий нерв системасига турли моддаларни киритиш учун электрофорез микроинъекцияси деган усул қўлланилмоқда. Текшириладиган нерв марказига шу мақсадда текшириладиган эритма тўлдирилган жуда ингичка микропипетка киритилади. Пипетка тешиги жуда тор бўлгани учун юза тортиш кучлари эритманинг қайтиб чиқишига тўсқинлик қилади; шу сабабли моддани тўқимага киритиш учун электрофорез методи қўлланилади. Микропипетканинг кенгроқ ташқи учига бир электрод киритилади, пипетканинг иккинчи учи эса гавда юзасига тақалади. Кучсиз ўзгармас токни электродлардан ўтказиб, пипеткага тўлдирилган модда эритмаси тўқимага киритилади. Бу модда катион бўлса, микропипеткадаги электрод анодга уланган тақдирдагина у (модда эритмаси) тўқимага киради. Модда анион бўлса, микропипетка ичидаги электрод катодга уланган тақдирдагина у (модда эритмаси) тўқимага киради.