Е. Б. Бабский, А. А. Зубков, Г. И. Косицкий, Б. И. Ходоров

Глюкокортикоидлар. Глюкокортикоидлар (гидрокортизон, кортикостерон, кортизон) оқсил, углевод ва ёқлар алмашинувига таъсир этади. Улар ичида актикроғи гидрокортизондир. Глюкокортикоидлар жигарда глюкоза ҳосил бўлишини кучайтириб, қондаги қандни кўпайтира олгани учун шундай аталган. Бу процесс аминокислоталарнинг тезроқ дезаминланиши ва азотсиз қолдиқларининг углеводларга айланиши йўли билан юзага чиқади. Бу ҳолда жигардаги гликоген миқдори ҳатто ортиши мумкин. Глюкокортикоидларнинг таъсири шу билан адреналин таъсиридан фарқ қилади, органзмга адреналин юборилганда қондаги глюкоза кўпайиб, жигардаги гликоген запаси камаяди.
Глюкокортикоидлар организмга юборилганда тўқима оқсилларининг парчаланиши кучаяди ва синтезланиши сусаяди, натижада тўқималардаги оқсилларнинг умумий миқдори камаяди. Бироқ орган ва тўқималарнинг специфик функциясини юзага келтирувчи оқсиллар (масалан, мускулларни қисқартирувчи оқсиллар) миқдори ўзгармайди.
Қондаги оқсиллариинг кўп парчаланиши натижасида аминокислоталар кўпаяди, улар жигарда утилизация қилиниб, қисман глюкоза ва гликогенга айланади. Глюкокортикоидлар ёғ алмашинув интенсивлигини ҳам оширади. Улар ёғ деполаридан ёғларнинг сафарбар қилинишини кучайтиради ва шу билан энергия алмашинувининг кучайишига ёрдам беради. Глюкокортикоидлар пластик алмашинув процессларига ҳам таъсир этиб, тикланиш — репарация процессларига ёрдам беради.
Глюкокортикоидлар ҳаёт учун зарур гормонлар эмас, уларнинг йўқлиги организмни дарҳол ўлимга олиб бормайди. Бироқ глюкортикоидлар кам чиққанда организмнинг турли зарарли таъсиротларга чидами камаяди, шунинг учун юқумли касалликлар ва бошқа ёмон таъ-сиротлар оғир ўтади ва кўпинча ўлимга олиб келади.
Глюкокортикоидлар антителолар ҳосил бўлишини камайтиради, яллиғланиш, ревматизм ва бошқа баъзи касалликлар муносабати билан организмда рўй берувчи реакцияларни сусайтиради. Клиникада ревматизм, аллергик процесслар ва бошқа касалликларни даволашда глюкокортикоидларни татбиқ этиш шунга асосланган. Глюкокортикоидлар яллиғланиш процессларининг ривожланишини тўхтатгани учун уларни яллиғланишга қарши гормонлар ҳам деб аташади. Минералокортикоидлар эса организмда натрий ва сув ушланиб қолишига ёрдам бериб, яллиғланиш процессида тўқималарнинг шишиб кетишини, шунингдек яллиғланиш реакцияларининг бошқа белгиларини кучайтиради. Шу сабабли минералокортикоидларни яллиғланишга тарафдор гормонлар деб аташади.