Е. Б. Бабский, А. А. Зубков, Г. И. Косицкий, Б. И. Ходоров

Буйрак усти безлари хромаффин тўқимаси ички секреция
функциясининг нерв системаси томонидан бошқарилиши
(нерв регуляцияси)
Буйрак усти безларига иннервация берадиган қорин нерви таъсирланса— адреналин секрецияси кучайишини, бу нерв қирқиб қўйилганда эса адреналин секрецияси камайишини 1910 йилда М. Н. Чебонсаров кўрсатиб берган. Бундан англашиладики, буйрак усти безларининг хромаффин тўқимасидан гормон чиқишини нерв системаси қорин нерви таркибидаги симпатик нерв толалари орқали бошқаради.
Буйрак усти безлари хромаффин тўқимасининг ички секреция функциясини бошқарувчи марказ олий вегетатив марказлар жойлашган гипоталамусдадир. Тажрибада гипоталамусга таъсир этилганда қондаги катехоламинлар миқдори ортиб кетади.
Буйрак усти безларининг секретор нервлари таъсирланганда адреналин чиқиши ҳам, норадреналин чиқиши ҳам кучаяди. Адреналин дастлаб норадреналинга нисбатан бир мунча ортиқ чиқади, лекин таъсирот давом этаверса, бора-бора адреналин чиқиши камайиб, норадреналин кўпроқ чиқади. Буйрак усти безларининг иши узоқ вақт кучайтирилса, улар гормонни адреналинга қадар тобора кам синтез қилиб, оралиқ модда — норадреналинни тобора кўи чиқаради.
Организмда моддалар алмашинувини кучайтирадиган актив фаолият билан ўтувчи ҳамма ҳолатларда, масалан, эмоционал қўзғалиш, жисмоний иш бажариш, организмнинг совуши ва шунга ўхшаш ҳолатларда буйрак усти безлари адреналинни кўпроқ чиқаради.
Эмоционал қўзгалишда буйрак усти безларидан адреналин кўп чиқишини У. Кеннон аниқлаган. Вовиллаётган итни кўрган мушукнинг буйрак усти безлари веналаридаги қонда адреналин кўпайганини У. Кеннон кузатган.
Адреналин секрециясининг ортиши одамнинг эмоционал ҳолатларида рўй берадиган бир қанча физиологик ўзгаришлар механизмини тушунтириб беради. Масалан, студентлар имтиҳон топшираётган вақтда, спортчилар старт олдидан мусобақа бошланиш сигналини кутиб турганда қондаги глюкозанинг кўпайиши ва сийдик билан кўплаб чиқиши буйрак усти безларидан адреналиннинг кўп чиқиш натижасидир. Бу факт адреналин секрециясига бош мия марказларининг таъсир этишидан гувоҳлик беради.
Қонда глюкозанинг камайиб кетиши буйрак усти безларидан адреналин чиқишини кучайтиради. Масалан, ҳайвон организмига инсулин юбориб гипогликемия вужудга келтирилса, адреналин секрецияси кучаяди, натижада жигардаги гликоген сафарбар этилиб, қондаги глюкоза кўпаяди.