Е. Б. Бабский, А. А. Зубков, Г. И. Косицкий, Б. И. Ходоров

Еғ алмашинувининг бошқарилиши
ёғ алмашинувини нерв системаси бошқариши гипоталамус ядролари шикастланганда ёг алмашинувининг ҳар хил ўзгариши билан исботланади. Масалан, вентромедиал ядро шикастланганда ҳайвон семиради, латерал ядролар шикастланганда эса чўпдай озиб кетади. Одамнинг баъзи оғир патологик семириш ҳолатларида гипоталамуснинг кулранг дўмбоғи зарарланишини патологоанатомик текширишларда аниқлашган. Ёғ алмашинувига нерв системаси гипофиз, қалқонсимон бсз, меъда ости бези ва жинсий безларнинг ички секрециясини ўзгартириш йўли билан таъсир эта олади. Нерв системаси тўқималардаги ёғ алмашинувига бевосита таъсир этса ҳам, эҳтимол.
Сичқон ва қуёнлар устида ўтказилган тажрибаларнинг натижалари юқоридаги тахминга асос бўла олади. Бу ҳайвонларнинг курак оралиғидаги ёғ тўпламини иннервацияловчи нерв бир томонлама қирқиб қўйилган. Денервация қилинган томонда ёғдан фойдаланиш бузилган: ҳайвон оч қолганда жуда озиб кетиб, ҳамма ёғ деполари бўшаб қолган, денервация қилинган томонда эса ёғ тўқимаси сақланиб турган. Нерв системасининг ёғлар алмашинувига таъсирини нерв системасининг трофик функциясига мисол деб билиш мумкин.
Ёғ алмашинуви гормонал йўл билан бошқарилишини гипофиз, қалқонсимон без, меъда ости бези ва жинсий безлар гормонларини ҳайвонларга юбориб қилинган тажрибаларда, шунингдек бу безларни олиб ташлаш тажрибаларида кўриш мумкин. Ички секреция безларининг таъсири ҳақида клиник кузатишлар йўли билан кўп материал тўпланган. Масалан, гипофиз, қалқонсимон без ва жинсий безлар функцияси сусайганда одамнинг семириб кетиши аниқланган. Меъда ости безининг гормони — инсулин юборилганда углеводлардан ёғлар ҳосил бўлиши кучаяди.
Фосфатидлар ва стеринлар алмашинуви
Ёғга бой масаллиқларда аксари озгина фосфатидлар ва стеринлар бўлади. Бу моддаларнинг физиологик аҳамияти жуда катта. Улар ҳужайра структураларининг таркибига, жумладан, кўп ҳужайраларнинғ таркибига, шунингдек ядро моддаси ва протоплазма таркибига киради.
Нерв тўқимаси фосфатидларга айниқса бой; нерв тўқимасининг функциясида фосфатидларнинг аҳамияти катта бўлса керак.
Фосфатидлар ичак деворида ва жигарда синтезланади (жигар венасидаги қонда фосфатидлар кўпроқ эканлиги аниқланган). Жигар лецитин депоси ҳисобланади; айниқса липидларга бой овқат истёъмол қилингач жигарда лецитин кўпаяди.
Фосфатидлар нейтрал ёг, фосфат кислота ва азотли асос — холиндан синтезланади. Масалан, овқатда холин ёки метионин (организмда холин синтезланиши учун зарур метил группалар донатори бўлган аминокислота) бўлмаса, жигарда лецитин ҳосил бўлиши мумкин эмас, натижада ёг алмашинуви бузилади — жигарнинг ёг инфильтрацияси рўй беради. Шу пайт жигардаги ёғ миқдори нормадаги 5% ўрнига 50% га етиши мумкин.
Стеринлар, хусусан холестериннинг физиологик аҳамияти ғоят муҳим. Организмда буйрак усти безлари пўстлоқ қаватининг гормонлари ва жинсий безларнинг гормонлари холестериндан ҳосил бўлади. Овқатдаги баъзи бир стеринлар, масалан, витамин D нинг физиологик активлиги катта.