Дала экинларининг асосий зараркунандалари

Кураш чоралари. Илдиз галл нематодасига қарши хўжаликда амалга ошириладиган асосий агротехник чора-тўғри алмашлаб экишдир. Алмашлаб экишда нематодадан зарарланмайдиган хашаки нўхат (Vigna sinensis var erecta Pavt.) кўпроқ қўл келади, бу нўхат фитонцидлар чиқариб, тупроқдаги нематодаларни ўлдиради; нўхатнинг 661-нави, айниқса қўл келади (Бродский, Землянская). Кимёвий чоралардан қуйидагиларни амалга ошириш мумкин: тупроқ юзасига гексахлоран сепилиб кейин бароналанади: экин экишдан олдин ер гектарига 400-800 л ҳисобидан хлорпикрин билан фумигация қилиш ёки экин экишдан бир ҳафта олдин 1 м ² га 200 г ҳисобидан натрий нитрат солиш ҳам фойда беради. Сўнгги вақтдаги тажрибаларга қараганда (Соколов, Покровский, Свешникова, Митрофанов, Скабрилович), экин экишдан 5-7 кун олдин тупроққа диметилдитиокарбамин кислотанинг метил, этил ва пропил эфирини ёки диэтилдитиокарбамин кислотанинг пропил эфирини (таъсир этувчи моддаси 20 % бўлганда) 1 м² га 150 г ҳисобидан солиш ғоят фойдалидир. Бунинг натижасида нематодаларнинг 90 % дан ортиғи нобуд бўлади. Бу дорилар амалда ўсимликларга зарарли эмас, фақат картошка бир оз кечроқ кўкариб чиқади, аммо бунинг унчалик зарари йўқ.


Ўсимта нематодаси
Anguillulinа pratensis De Маn;
синоними: Ти1еnсhиs рrаtеnsis Dе Маn.
Зарари. Ўсимта нематодаси ҳар нарсани ея берадиган угрицадир; у айниқса картошканинг туганак ва илдизига зарар етказиб, илдизларни нобуд қилади ва картошка ҳосилини баъзан 25 % гача камайтириб юборади. Нематода пиёз, лавлаги, сабзи, карам, салат, помидор, бодринг, ғалласимон ўсимликларга ҳам зарар етказади (Кирьянова, Тўлаганов), баъзан ғўза билан бедага ҳам зарар етказади. Нематодалар бевосита зарар етказиш билан бир қаторда ўсимликларни шикастлаб, бактерия ва замбуруғ касалликлари микробларининг киришига йўл очади. Нематодадан қаттиқ зарарланган ғалла ўсимлик майсалари, кўпинча, батамом қуриб қолади.
Тарқалиши. Ўсимта нематодаси Ўзбекистоннинг баъзи ҳудудларида, Россиянинг Европа қисмида (шимолий зонадан бошқа), Украинада, Белоруссияда, Ғарбий Европадаги кўпгина мамлакатларда, Шимолий, Марказий ва Жанубий Америкада учрайди.