Дала экинларининг асосий зараркунандалари

Тарқалиши. Акация сохта қалқондори Марказий Осиё, Қозоғистон, Кавказ, Узоқ Шарқда, Россиянинг Европа қисмида, Ғарбий Европа мамлакатларида ва Шимолий Америкада тарқалган.
Таърифи. Акация сохта қалқондорининг биринчи насли 4-7 мм катталикда, жуда ҳам қавариқ, оч жигар ранг тусда бўлади, иккинчи насли 2-5 мм катталикда, яссироқ, сариқ-жигар ранг тусдадир. Оғиз органлари, оёқлари ва мўйловлари жуда кичкина бўлади, гавдасининг бўғимларга бўлинганлиги деярли сезилмайди.
Тухуми 0,08-0,10 мм катталикда, овал шаклда, оқ бўлиб, мумсимон чанги бор.
Биринчи ёшдаги личинкаси оқ тусли бўлиб, мумсимон караш билан қопланган; гавдаси ясси бўлиб, учида иккита узун дум ипи бор, оёқлари узун, рўй-рост кўриниб туради. Иккинчи ёшдан бошлаб личинка дум ипларини йўқотиб, қалқон шаклини олади, қалқони овал шаклли, оч сарғиш тусли бўлиб, кейин қорамтир тусга киради.
Ҳаёт кечириши. Акация сохта қалқондори Марказий Осиёда йилига иккита насл беради. Личинкалари токда, кўпгина дарахт, буталарнинг тана ва шохларида ва ўтсимон ўсимликларда қишлайди. Апрелда личинкалар қишлаган жойларида озиқлана бошлайди. Улар оқ акацияда айниқса кўп бўлади, бу ҳашаротнинг номи ҳам шундан олинган. Сохта қалқондорнинг зарари токда ва қисман олмада яққолроқ сезилади. Токда биринчи насл сохта қалқондор эски ва бултурги новдаларни сўради.
Личинкалар май охирида вояга етган қалқондорларга айланади; июн бошларида урғочиси 1000 тача тухум қўйиб, кейин нобуд бўлади. Тез орада тухумлардан иккинчи насл личинкалари пайдо бўлиб, улар токка ўрмалаб чиқади. Биринчи ёшдаги личинкалари шамол ёрдамида ҳам тарқалиши мумкин; ҳашарот токка ён-веридаги акация дарахтларидан баъзан шу йўл билан ўтади,
Сохта қалқондорнинг личинкалари ёпишқоқ тезак чиқаради, бу ҳашарот кўп бўлса, бутун ток тезак билан қопланади, шу билан бирга тезак узумга тушса унинг ширасини камайтиради. Личинкалар кўпинча узумнинг ўзини ҳам сўради. Улар кузда озиқланишни тугаллаб, сохта қалқондорнинг майдароқ формасига айланади (мавсумий диморфизм). Марказий Осиёда акация сохта қалқондорининг эркаклари топилган эмас. Бу ҳашарот партеногенез йўли билан кўпаяди.