Buxgalteriya hisobi, auditorlik faoliyati, buxgalter va auditor kasblari haqida tushuncha

23-modda. Konsolidatsiyalashgan moliyaviy hisobot
Ushbu moddada umumlashgan (konsolidatsiyalashgan) moliyaviy hisobotni tuzish qoidalari belgilangan bo‘lib, u xalqaro standartlarga muvofiq amalga oshiriladi. Bunda bosh firmadan ajralib chiqib faoliyat qilayotgan korxonalar guruhi uchun konsolidatsiyalashgan moliyaviy moddalarni tuzish va taqdim qilish to‘g‘risida so‘z yuritiladi. Qonunning mazkur moddasiga muvofiq bir yoki bir necha shu’ba korxonalar, filiallar va vakolatxonalariga ega bo‘lgan korxonalar konsolidatsiyalashgan moliyaviy hisobot tuzadilar.
Ushbu moddaning talablari vazirliklar, idoralar va byudjet tashkilotlarining yig‘ma moliyaviy hisobotiga nisbatan tadbiq etilmaydi. Konsolidatsiyalashgan moliyaviy hisobot buxgalteriya hisobi standartlariga muvofiq tuziladi.
Bosh korxonaning shu’ba korxonalariga qo‘shgan hissalari uning moliyaviy hisobotida moliyaviy qo‘yilmalari sifatida aks ettiriladi. Yuridik shaxslar o‘z filiallari, vakolatxonalari va boshqa tarkibiy bo‘linmalarini, ularning balanslari va hisobot shakllarini belgilangan tartibda tegishli yuridik shaxsning konsolidatsiyalashgan hisobotiga kiritish sharti bilan mustaqil balansga ajratib chiqishlari mumkin.
24-modda. Moliyaviy hisobotning hisobot davri
Moliyaviy hisobotning hisobot davri ushbu moddaga muvofiq 1 yanvardan 31 dekabrga qadar bo‘lgan kalendar yil deb belgilangan. Yangidan tashkil etilgan yuridik shaxslar uchun ular yuridik shaxs huquqiga ega bo‘lgan sanadan boshlab, yuridik shaxs hisoblanmaydigan sub’ektlar uchun esa, ular tegishli davlat organlarida ro‘yxatga olingan sanadan boshlab, o‘sha yilning 31 dekabrigacha bo‘lgan davr birinchi hisobot yili deb hisoblanishi belgilangan.
Agar yuridik shaxs joriy yilning 1 oktyabridan keyin ro‘yxatga olingan bo‘lsa, uning uchun birinchi hisobot yili keyingi yilning 31 dekabrida tugaydi.
Ro‘yxatdan o‘tishga yoki yuridik shaxs huquqini qo‘lga kiritgunga qadar amalga oshirilgan xo‘jalik muomalalari to‘g‘risidagi ma’lumotlar birinchi hisobot yili moliyaviy hisobotiga kiritiladi.
Xo‘jalik yurituvchi sub’ektlarning moliyaviy hisoboti soliq organlari mulkdorlar, davlat statistika organlari va boshqa organlarga taqdim qilinadi.
Turli xil davlat muassasalari va boshqalar uchun moliyaviy hisobotni tuzish bo‘yicha qo‘yiladigan talablar buxgalteriya hisobi standartlarida bayon qilingan.
Moliyaviy hisobot yilining boshidan o‘sib boruvchi jami bilan har chorakda, moliya vazirligi tomonidan belgilangan muddatlarda taqdim qilinadi.
Byudjet muassasalari choraklik va yillik hisobotlarni moliya vazirligi tomonidan belgilangan muddatlarda yuqori organlarga taqdim qiladi.
O‘zbekiston Respublikasi Vazirlar Mahkamasining qaroriga muvofiq boshqa ayrim turdagi xo‘jalik yurituvchi sub’ektlar uchun hisobotni taqdim qilishning boshqa muddatlari belgilanadi.