Buxgalteriya hisobi, auditorlik faoliyati, buxgalter va auditor kasblari haqida tushuncha

4.3. O‘zbekistonda auditorlik faoliyatining shakllanishi va rivojlanishi haqida
Mamlakatimizda auditorlik faoliyati evolyutsiyasini tadqiq qilish natijalariga asoslanib, uni me’yoriy-huquqiy tartibga solish tizimi rivojlanishini uchta bosqichga bo‘lish mumkin (4.1-jadval).
4.1-jadval
O‘zbekistonda auditorlik faoliyatini me’yoriy- huquqiy tartibga solish tizimining rivojlanish bosqichlari

Bosqichlar	Davr	Qisqacha tavsifi
1 bosqich	1990-1993 yillar	90-yillarning boshidan 1993 yilgacha, ya’ni 1992 yil 9 dekabrda “Auditorlik faoliyati to‘g‘risida” qonun qabul qilingungacha
2 bosqich	1993-2000 yillar	Auditorlik faoliyati milliy standartlari (AFMS) ishlab chiqila boshlandi. 2000 yil 26 mayda “Auditorlik faoliyati to‘g‘risida”gi qonunning yangi tahriri va 2000 yil 20 sentyabrda Vazirlar Mahkamasining 365-sonli “Auditorlik faoliyatini takomillashtirish va auditorlik tekshiruvlarining ahamiyatini oshirish to‘g‘risida”gi qarori va b.
3 bosqich	2001 yildan hozirgacha	O‘zbekiston Respublikasi Prezidentining 2007 yil 4 aprelda 615-sonli “Auditorlik tashkilotlari faoliyatini yanada takomillashtirish va ko‘rsatilayotgan xizmatlar sifati uchun ularning javobgarligini oshirish to‘g‘risida”gi qarori. 2007 yil 17 sentyabrda “Auditorlik faoliyati to‘g‘risida”gi Qonunga o‘zgartish va qo‘shimchalar kiritish haqidagi” qonun qabul qilindi. Yangi auditorlik faoliyati milliy standartlari va ularga tenglashtirilgan me’yoriy hujjatlar ishlab chiqilmoqda.

Shuningdek, mamlakatimizda mustaqillik yillarida auditorlik faoliyatini me’yoriy- huquqiy tartibga solish tizimi shakllandi va u xalqaro hamjamiyatga uyg‘unlashmoqda (4.1-rasm).

Ushbu tizimning birinchi (yuqori) pog‘onasida O‘zbekiston Respublikasining «Auditorlik faoliyati to‘g‘risida»gi Qonuni (yangi tahriri) turadi.
Mazkur qonunni amalga oshirish maqsadida qabul qilingan Prezident farmonlari va Hukumat qarorlarini ushbu tizimning ikkinchi pog‘onasiga kiritish mumkin.