Бухоро давлат университети ҳузуридаги илмий даража берувчи phD

Тадқиқот ишининг мақсади. Ўзбек адабиётида шеърий драмаларнинг шаклланиш омиллари, ғоявий-бадиий такомил босқичлари, ўзига хос поэтик-композицион хусусиятлари, жанрий табиатида драматик ва лирик тур белгиларининг синкретлашиш ва синтезлашиш қонуниятларини аниқлашдан иборат.
Тадқиқотнинг вазифалари:
шеърий драма генезисини, шаклланиш омилларини, бадиий такомил босқичларини аниқлаш;
шеърий драма жанрий табиатига хос поэтик-композицион хусусиятларни очиб бериш;
шеърий драмада анъана ва новаторлик белгиларини далиллаш;
шеърий драмада лирик ва драматик тур белгиларининг синкретикликда намоён бўлишини кўрсатиш;
шеърий драмада жаҳон ва ўзбек адабиёти адабий анъаналари синтезини асослаш;
шеърий драманинг бадиий такомилига хос жиҳатларни тарихийлик ва замонавийлик масаласи нуқтаи назаридан ёритиш.
Тадқиқотнинг объекти. Тадқиқот объекти сифатида Фитрат, Усмон Носир, Ойбек, М.Шайхзода, Ҳамид Олимжон, Уйғун, Иззат Султон, Эркин Воҳидов, Абдулла Орипов, Усмон Қўчқор, Иқбол Мирзо сингари шоирларнинг шеърий драмалари танланди.
Тадқиқот предмети. Фитрат, Усмон Носир, Ойбек, М.Шайхзода, Ҳамид Олимжон, Уйғун, Иззат Султон, Эркин Воҳидов, Абдулла Орипов, Усмон Қўчқор, Иқбол Мирзо сингари шоирларнинг шеърий драмаларига хос бадиий-композицион, лингвопоэтик хусусиятларни, образ ва образлиликни ўрганиш тадқиқот предметини ташкил этади.
Тадқиқот усуллари. Тадқиқот жараёнида қиёсий-типологик, аналитик, психологик ва компонент таҳлил каби методлар қўлланилди.
Тадқиқотнинг илмий янгилиги қуйидагилардан иборат:
шеърий драманинг генезиси антик адабиёт, жаҳон адабиёти ва ўзбек мумтоз адабиётига боғлиқлиги аниқланган;
жанр табиатида драма, роман, достон (эпос ва лирика) табиатига хос белгиларнинг ўзаро синкретлашув ва бадиий синтезлашув жараёнлари асосланган;
янги ўзбек адабиётида шеърий драманинг юзага келиши А.Фитрат ва У.Носир асарларидан бошланганлиги, жаҳон ва ўзбек адабиёти адабий анъаналари асосида жанрнинг бадиий такомил топгани, унга хос анъана ва новаторлик қирралари далилланган;
шеърий драмада тарихийлик ва замонавийлик, бадиий тўқима, лингвопоэтика, муаллифнинг услубий маҳорати масалалари ёритилган.