Банкларда молиявий ҳисоб

9.Банк операциялари ички назорати ва унинг турлари (дастлабки, Бэк-офис ходимлари, бош бухгалтер, назоратчи-бухгалтер, пул ҳисоб-китоб ҳужжатлари)
Bank operatsiyalarining ichki nazorati bank rahbariyati va barcha bank xodimlari tomonidan kunlik bank operatsiyalarini amalga oshirish jarayonida ularning qonunchilikka mosligi, samaradorligi, yuqori malakada bajarilishi va moliyaviy hisobotlarning ishonchliligini taʼminlash tizimidir. Ichki nazorat maʼlum yoki aniq vaqt mobaynida amal qilinishi lozim boʻlgan tartib yoki qoida boʻlmasdan, balki u bankning barcha boʻgʻinlarida kunlik bank operatsiyalarining boshlanishidan tortib tugagunga qadar doimiy yuritiladigan bank faoliyatining ajralmas qismidir.
Ichki nazorat buxgalteriya hisobini yuritishda, moliyaviy va boshqa hisobotlarni tuzishda xoʻjalik operatsiyalarini amalga oshirishning qonuniyligini, iqtisodiy jihatdan maqsadga muvofiqligini, aktivlarning but saqlanishini taʼminlash, talon-taroj qilish hollari va xatoliklarning oldini olish hamda aniqlash maqsadida buxgalteriya hisobi subyektining rahbari tomonidan qabul qvilingan hisob siyosati asosida tashkil etilgan chora-tadbirlar tizimidir. Buxgalteriya hisobi subyekti ichki nazoratni tashkil qiladi va amalga oshiradi (Oʻzbekiston Respublikasining “Buxgalteriya hisobi toʻgʻrisida”gi qonuni. 2016-yil 13-apreldagi OʻRQ-404-son qarori, 21-moddasi). Ichki nazorat quyidagilarga: dastlabki nazorat, joriy nazorat va yakuniy nazoratga boʻlinadi. Dastlabki nazorat Front-ofis yoki masʼul ijrochi buxgalterlar tomonidan operatsiyalarni bajarmasdan oldin ularning qonunchilikka mos ekanligini aniqlash boʻyicha amalga oshiriladigan nazoratdir. Joriy nazorat - Bek-ofis yoki nazoratchi buxgalter tomonidan Front-ofis yoki masʼul ijrochi buxgalter maʼqullagan barcha bank operatsiyalarining qonunchilikka mosligini aniqlash maqsadida qaytadan amalga oshiriladigan nazorat tushuniladi. Joriy nazorat pul hisob-kitob hujjatlarining asl va elektron nusxalarining bir-biriga mosligini tekshirishni ham oʻz ichiga oladi. Yakuniy nazorat - amaliyot kun tugagandan soʻng, keyingi bank ish kunidan kechikmagan holda Front-ofis yoki masʼul ijrochi buxgalter va Bek-ofis yoki nazoratchi buxgalter tomonidan bajarilgan barcha bank operatsiyalarining qonunchilikka mosligi va maqsadga muvofiqligini tasdiqlash maqsadida amalga oshiriladigan nazoratdir. Yakuniy nazorat bank Boshqaruvi tashkil qilgan Yakuniy nazorat xizmati tomonidan amalga oshiriladi va u, faqat bank Boshqaruviga boʻysunadi.