Қарши давлат университети ҳузуридаги илмий даражалар берувчи phD

Тадқиқотнинг мақсади тарихий ҳақиқат ва бадиий тўқима нисбати, Амир Темур образининг бадиий талқини, портрет, пейзаж, туш ва мактуб бадиий бутунликни таъминловчи омиллардан эканлигини асослашдан иборат.
Тадқиқотнинг вазифалари:
ўзбек насрида тарихий тетралогиянинг генезиси, даврий босқичлари, ҳамда поэтик канонларини белгилашда жаҳон адабиётшунослиги контекстида бўлаётган ўзгаришларни умумлаштириш;
Амир Темур ва темурийларнинг тарихий жараёндаги фаоллиги, ёзувчи ижодий дунёсида шаклланган романий тафаккур миқёсларининг чуқурлашувини таснифлаш;
тарихий тетралогияда муҳит ва жамият ҳаётининг акс этиши, сюжет ва композицион яхлитлик қирраларининг мувофиқлигини асослаш;
Амир Темур характерининг ёритилиши, адабий маром ва тарихий илғам қонуниятларининг бутунлигини асослаш;
бадиий ижодда анъана ва адабий алоқалар синтезини таснифлашда ижодкор шахси ролининг ортишини белгиловчи етакчи тамойиллардан бири эканлигини кўрсатиш;
портрет, пейзаж, туш, мактуб сингари асосий ва ёрдамчи компонентларнинг ёзувчи ижодий ниятини амалга оширувчи омил эканлигини белгилаш.
Тадқиқотнинг объекти сифатида Муҳаммад Алининг “Улуғ салтанат” тетралогияси олинди.
Тадқиқотнинг предметини асарда ёритилган тарихий тетралогиянинг поэтик қонуниятлари, ёзувчи услуби, сюжет ва композиция яратишдаги маҳорати, романий тафаккур салмоғи ортишидаги бадиий изланишлари, жаҳон насри таъсирида юзага келган ўзгаришларни таҳлил ва талқин қилиш муаммолари ташкил қилади.
Тадқиқотнинг усуллари. Диссертацияни шакллантиришда қиёсий-типологик, структурал, биографик, герменевтик ва психологик таҳлил усулларидан фойдаланилди.
Тадқиқотнинг илмий янгилиги қуйидагилардан иборат:
ўзбек адабиётида тарихий тетралогиянинг юзага келиши Муҳаммад Али ижоди билан боғлиқ эканлиги очиб берилган;
макон ва замон чегарасида қаҳрамон интеллекти намойиши сюжет линияларини бириктириш омили эканлиги кўрсатилган;
жанрнинг ички ва ташқи таъсирида шаклланган тарихий тетралогия қонуниятларининг замонавий талқини “Улуғ салтанат” асарига таянган ҳолда аниқланган;
тарихий қаҳрамон сиймосини юзага келтиришда хронотоп усули, портрет, пейзаж, туш, мактуб, диалог мотивлари бадиий яхлитликни таъминловчи муҳим категория экани очиб берилган.