Андижон давлат тиббиёт институти факультатив, госпитал терапия, халқ табобати ва эндокринология кафедраси

ГИПЕРПАРАТИРЕОЗ (ГПТ)
Гиперпаратиреоз (фиброз-кистозли остеодистрофия, Реклингаузен касаллиги) – қалқонсимон олди безларининг гиперплазияси ёки ўсмалари натижасида паратгормонининг ортиқча ишлаб чиқарилиши билан кечадиган касаллик.
Бу касаллик 1:1000 нисбатда учрайди, аёллар эркакларга нисбатан 2-3 марта кўпроқ ҳасталанишади. Кўпроқ 20-50 ёшлиларда учрайди. Болалар, ўсмирлар ва қарияларда нисбатан кам учрайди, бироқ туғма бирламчи ГПТ ҳолатлари ҳам учраган.


ЭТИОЛОГИЯ ВА ПАТОГЕНЕЗИ.
Бирламчи, иккиламчи ва учламчи гиперпаратиреозлар ажратилади. Бирламчи ГПТ (I ГПТ)да паратгормонининг гиперсекрецияси, К.О.Б.нинг аденомалари, гиперплазияси ёки ҳавфли ўсмалар билан боғлиқ бўлади. Иккиламчи ГПТ (II ГПТ) да паратгормонининг гиперсекрецияси, сурункали буйрак етишмовчилиги натижасида ривожланувчи гиперфосфатемия ва 1,25 (ОН)2 Д3 нинг етишмаслиги туфайли, ошқозон-ичак системаси касалликлари туфайли ривожлануви гипокальциемия (мальабсорбция синдроми) натижасидир.
Учламчи ГПТ (III ГПТ) – узоқ вақт давом этган II ГПТ туфайли («гиперфункция – гиперплазия – ўсма» принципига асосан) ҚОБ ларида аденомалар ҳосил бўлиши билан боғлиқ.
I ва III ГПТ ларда кальцийнинг зардобдаги миқдори ва ПТГ нинг ортиқча секрецияси ўртасида қайта боғланиш принципи бузилади. Гиперпаратиреоз касаллигида нормада доим бўлувчи суяклар генерацияси ортиқча кучаяди. Янги ҳосил бўлаётган суяклар кам минерализацияланган бўлиб улардаги кальций миқдори эски етилган суякникидан кам бўлади. Суяклар юмшоқ эгулувчан ва енгил юклама таъсирида ҳам осон эгилади ва патологик синишлари кузатилади. Буйраклар орқали кальций чиқишининг кучайиши беморда гипоизотенурияга, полиурияга ва чанқашга сабаб бўлади. ПТГ – буйраклар орқали сувнинг чиқишини кучайтиради. ГПТ да буйрак каналчаларининг АДГ га сезувчанлиги пасаяди.
Кальцийурия буйракларда тошлар ҳосил бўлишига нефролитиазага сабаб бўлади: Буйраклар паренхимасида кальцийнинг ўтириши нефрокальциноз ривожланишига олиб келади. Буйраклар етишмовчилиги ривожланади, қон босими кўтарилади. ГПТ да ошқозон ичак системасида кўпроқ 12-бармоқли ичакда яралар ҳосил бўлади. Яралар ҳосил бўлиши жараёни тўлик ўрганилмаган. Бу ҳолат гиперкальциемия ва атеросклероз, қон томирлар кальцификацияси шиллиқ пардалар трофикасини бузиши туфайли ривожланиши мумкин.