Адҳам ваисов

СЎГАЛЛАР

Сўгалларни папилломатоз вирус чақиради.

Оддий сўгал, асосан, қўлларда, юзда, лаб қизил ҳошиясида, лаб бурчагига яқин соҳада, жуда кам ҳолларда оғиз шиллиқ пардасида учрайди. Оддий сўгал диаметри 1 см гача борувчи тугунчадан ташкил топади. Тугунча тери сатҳидан анча кўтарилиб туради, ранги қўнғир ёки тери рангида, зич консистенцияда. Узоқ сақланувчи йирик сўгал юзасида сўрғичсимон ўсимтаси бўлиб, юзаси муғузланиб туради.
Ясси сўгал кўпроқ болалар ва ёшларда кузатилади. Ўлчамлари 3 мм гача бўлган, ясси тери сатҳидан бироз кўтарилиб турувчи, кўпинча полигонал шаклидаги тугунчалардан иборат. Ранги тери рангида ёки пушти, қўнғир тусда бўлади. Бу хил сўгаллар кўп учровчи соҳа: қўл панжаси юзалари ва юз териси. Юзда кўплаб тошса, лаб қизил ҳошиясида ҳам кузатилади. Айрим болалар бироз қичиши­ши­дан шикоят этадилар.
Даволаш. Юқоридаги тур сўгалларда вирусга қарши 3% ли оксалин, 5% ли теброфен, 0,5 % бонафтон мазлари ишлатилади. Суггестив терапия ҳам ижобий таъсир кўрсатади. Криотерапия ва электрокоагуляция яхши самара беради.

ЎТКИР УЧЛИ КАНДИЛОМАЛАР

Юмшоқ консистенцияли, бўлак-бўлаклардан ташкил топган ва кўриниши "гулкарам", "хўроз тожи"ни эслатувчи, ингичка "оёқча"да турувчи ҳосиладир. Ранги пушти ёки соғ тери рангида, таъсирланиш натижасида катталашади. Ўткир учли кандиломалар, асосан, жинсий аъзо, анал соҳа, олат тожи, ёпқичи соҳаси, қинга кириш соҳасида, болаларда эса бурун, ёноқ, бурун-лаб бурмалари соҳасида учрайди.

Давоси: жарроҳлик усулида олиб ташланади.


Пустулез дерматозлар.


ҲУСНБУЗАРЛАР (ACNE)
Оддий ҳуснбузар (Acne vulgaris)


Ҳуснбузар себореяли беморларда учровчи соч қопчаси ва ёғ безларининг сурункали йирингли яллиғланишидир. Касаллик кўпроқ балоғат ёшидан бошланади.
Клиник кўриниши. Терининг себореяли соҳаларида (бетда, бўйинда, кўкрак соҳаларида, елка камарида) қайсики ёғли терида, кенгайган тери тирқишларида фолликуляр йирингчалар, вужудга келади, асоси ва атрофи инфильтрацияланган бўлади. Комедонлар кузатилади. Ҳуснбузарнинг ривожланиш босқичида эритематоз, папулёз ва пустулёз даврлари тафовут этилади. Ҳуснбузарнинг асоратланган турлари: абсцесслашган ва шарсимон (конглобатли) ҳуснбузарлар тафовут этилади.