Abbatisa – ayollar katolik monastirlarining boshqaruvchilari. Abbatlik

Tauer, touer (ingl.tower – minora) – Londonda joylashgan qasr-qal’a. XI asrda Vilgelm I Bosqinchi davrida qurilgan deb koʻrsatilgan. Qirollarning qarorgohlaridan biri boʻlib, uning tarkibiga qamoqxona ham kirgan va Genrix VI davrida hatto shu yerda jinoyatchilar qatl qilingan. Bugungi kunda T. qirollikning qimmatbaho buyumlari va qadimiy qurollarni saqlovchi muzeyidir.
Tegirmon – suv tegirmoni rimliklarga V-VI asrlarda ma’lum edi. Ular orqali Galliya, Italiya, Germaniya va Yevropaning boshqa davlatlariga tarqalgan. XIV asrgacha suv T.lari yuqoridan keladigan suvning kuchi yordamida yogʻochdan yasalgan maxsus katta parrak bilan harakatlangan. Suv T.lari faqatgina un ishlab chiqarish uchun emas, balki boshqa hunarmandchilik turlari uchun ham xizmat qilgan. Misol uchun terini oshlash, qogʻoz ishlab chiqarish, kanop matosini qayta ishlash, temirchilik, metalga ishlov berish va boshqalarda qoʻllanilgan. Shamol T.i Gʻarbiy Yevropaga XI yoki XII asrda kirib kelgan. Ma’lumotlarga koʻra, shamol T.idan dastlab Eronda foydalanilgan. Arablar tomonidan bosib olingan Ispaniyada bunday T. VII asrdan ma’lum boʻlgan. Niderlandiyada esa X asrdan shamol T.i qurila boshlagan.
Tenlar, tanlar (ingl.) – anglo-saksonlar Britaniyasida (VIII–IX asr oʻrtalari) harbiy-xizmatchi zodagonlar vakillari. Harbiy xizmati evaziga qiroldan yer olgan, bu esa ularni Angliyada ritsarlar qatlamining oʻtmishdoshiga aylantirgan. Shotlandiyada T. atamasi XV asrgacha qadimiy aslzodalar urugʻini anglatgan.
Tentaj – Fransiya qiroli Filipp IV (1285-1314) tomonidan bilvosita olinadigan soliq xalq ichida shu nom bilan mashhur boʻlgan.
Teokratiya (yunon.theos – xudo va kratos – hokimiyat) – davlat boshqaruvi koʻrinishlaridan biri boʻlib, unda oliy dunyoviy va diniy davlat hokimiyati bir kishi qoʻlida toʻplangan boʻladi. Bunday davlatlar sirasiga oʻrta asrlar davri papa davlatini koʻrsatish mumkin. Undan tashqari Arab xalifaligini ham koʻrsatish mumkin. Ularda ham xalifa dunyoviy va diniy hokimiyatni boshqargan. Teokratik davlatlar sifatida diniy-ritsarlik ordenlarini ham koʻrsatish mumkin.