Abbatisa – ayollar katolik monastirlarining boshqaruvchilari. Abbatlik

Gusar – Vengriyada otliq askar, suvoriy qoʻshin.
Guschilar – Yan Gus ta’limoti tarafdorlari. XV asrning 1-yarmida Chexiyada boshlangan katolik cherkovini isloh qilishga qaratilgan milliy harakat. 1419-yil bahorida ularning Tabor togʻlariga yurishlari paytida shu nomni olishgan. Ular ikki lagerga boʻlinishib, birinchisi “chashniklar” (asosan, pragaliklar) va ikkinchisi “taboriylar”. G. tarkibida mamlakat aholisining barcha tabaqalari faol ishtirok etishgan. Ular dvoryanlar, shaharliklar, cherkov va dunyoviy intellegensiya, dehqonlar va boshqalar boʻlgan. Chashniklar oʻz nomini ibodat paytida vino solingan idish – chashka nomidan olishgan. Ular ibodatni chex tilida olib borish, cherkov yerlarini sekulirizatsiya qilib, ularni teng taqsimlash kabi talablar bilan chiqishgan. Chashniklar orasida feodallar koʻpchilikni tashkil qilishgan. Taboriylar radikal qarash egalari sifatida oʻz nomini ularning yigʻinlari oʻtkaziladigan Tabor togʻi nomidan olishgan. Shu yerda ular Tabor shahriga ham asos solishgan. Ularda barcha narsa umumiy boʻlgan. Ular ruhoniylarni saylash tartibini joriy qilib, oʻzlarini “xudo askarlari” deb atashgan. Taboriylar orasida dehqonlar koʻpchilikni tashkil qilgan. 1434-yilda guschilarning magʻlub boʻlishi natijasida amalda G. harakati oʻz nihoyasiga yetgan.
Guschilar urushi – Chexiyada katolik cherkovi va guschilar lageri oʻrtasida boʻlib oʻtgan fuqarolar urushi. 1419-yilda Yan Gusning jazolanishiga javoban boshlangan. Imperator Sigizmund I guschilarni oʻz kuchi bilan yengishiga ishonmagandan keyin 1420-1431-yillarda Rim papasi bilan birga Chexiyaga besh marta (1420, 1421-1422, 1426, 1427, 1431) salib yurishlarini amalga oshiradi. Unda Germaniya feodallari emas, balki Yevropaning boshqa mamlakatlari feodallari ham faol ishtirok etishgan. Guschilarning asosiy kuchlari Yan Jijka boshchiligidagi taboriylar edi. Ular dushmanning otliq qoʻshinlariga qarshi kurashish uchun ishlab chiqqan yangi taktikasi yordamida koʻplab janglarda gʻolib chiqishgan. Janglar paytida ular joy tapografiyasidan kelib chiqib yangi usullardan foydalanishgan. 1424-yilda Yan Jijkaning oʻlimidan keyin guschilarga Prokop Goliy (Kiyimsiz) boshchilik qiladi. Guschilarga qarshi 3-salib yurishi tugagandan keyin guschilar Chexiyadan tashqarida ham janglar olib borishgan. Bunday janglar bosqinchilik xarakteridagi yurishlar boʻlib, ular asosan, boshqa hududlarni talash uchun amalga oshirilgan. 1431-yil Domajlis yaqinida 5-salib yurishi ishtirokchilari guschilardan yengilishi natijasida Chexiya va katolik cherkovi oʻrtasida kelishuv uchun harakat boshlanib, 1431-yil oktabr oyida Shveytsariyaning Bazel shahrida guschilarni eshitishga qaror qilindi. Bazel muzokaralari 1433-yil Pragada davom ettirildi. Muzokaralar natijasida guschilar zaiflashtirildi va 1434-yil 30-may kuni Lipan qishlogʻi yaqinida boʻlgan jangda taboriylar yengildi va ularning katta qismi halok boʻldi. Bu guschilarning yengilishi sifatida emas, balki taboriylarning yengilishi sifatida qaraldi. G.U. natijasida Chexiya katolik cherkoviga soliq toʻlashdan ozod boʻldi, imperator Sigizmund Chexiya taxtini tan oladi. Qirol hokimiyati seym bilan cheklanadi. Guschilar harakati Yevropada XVI asrda reformatsiyaning gʻalaba qozonishi yoʻlidagi muhim omil boʻldi.