6-маьруза Қурилиш композицион полимер материаллар ва уларнинг турлари. Энергия ва ресурс тежамкор технологиялари – валцовкалаш, каландрлаш, экструзиялаш, пресс-қолиплаш, штамповкалаш ва бошқА. Хоссалари

2. Полимер пардозлаш-безак материаллари

Пардозлаш безак материалларига полимерлардан тайёрланган биноларни ички томондан безашда ишлатиладиган, иссиқлик ва товуш изоляцияси буюмлари киради. Бундан ташқари кўпчилик тўсувчи полимер материалларни ҳам пардозлаш-безак ишларида фойдаланиш мумкин. Пардозлаш лист материалларига қоғоз қатламли манзарали пластиклар, “полиформ”, “полидекор” манзарали панеллар ва бошқалар киради.

Қоғоз қатламли манзарали пластиклар аввалдан фенол-формалдегид, карбамид-формалдегид полимерлари шимдирилган махсус қоғозни иссиқ ҳолатда пресслаб тайёрланади. Пластик узунлиги 1000-3000 мм, эни 600-1600 мм, қалинлиги 1-5 мм ўлчамларда лист кўринишида ишлаб чиқарилади. Пластикнинг устки қатлами турли рангда, гулли, бўртма гулли, релефли типография усулида тайёрланган қоғоздан ясалади. Одатда расм ёғоч (дуб, ёнғоқ, ясен, бук) текстурасини, қимматбаҳо тошлар (мармар, малахит, янтар ва ш. к.) кўринишини ифодалайди. Бундан ташқари абстракт расмлар ҳам туширилган бўлиши мумкин.

Қалинлиги 1,6 мм бўлган пластиклар битум-резинали, эпоксидли, резорцин-формалдегидли елимлар ва мастикалар ёрдамида махкамланади. Бундан қалин пластиклар асосга механик усулда (мих, шуруп воситасида) маҳкамланади.

Қоғоз қатламли пластиклар маданий, маиший, савдо, жамоат биноларининг ичини пардозлаш ва мебел тайёрлашда ишлатилади.

Безак полистирол плиткалари (“полиформ”) зарбга чидамли полистирол полимерига кўпиртирувчи қўшимча аралаштириб тайёрланади. “Полиформ” плиткаларини қуйиш машиналари бўртма ўнг юза ҳосил бўлишини таъминлайдиган қолиплар билан жихозланган. Плиткалар ўлчами 500х500х8-10мм (11.7-расм). Плиткаларнинг периметри бўйлаб мих ва шуруплар ўтказиш учун тешиклар қолдирилган. “Полиформ” плиткалари (панеллари) билан маданий, маиший ва маъмурий биноларнинг деворлари, шиплари, интерер элементлари, суриладиган пардеворлар пардозланади.

27.1-расм. “Полиформ” плиткалари (панеллари)

“Полидекор” безак панеллар поливинилхлорид полимерларидан тайёрланган манзарали юпқа қаттиқ пардани вакуум пресслаш усулида бўртма юзали қилиб олинади.