4-жадвал. Оҳангарон ҳавзасининг археологик ёдгорликлари

2.44. Тўрткултепа Муротали - Бекобод эски магистралининг 68-км.да, Қўйроват қишлоғи яқинида жойлашган². 1963 йилда ЧҚАО томонидан қайд этилган. Истеҳком тўғри бурчак кўринишида баландлиги 13,5 м. бўлиб, унинг маданий қатлами 3,5 м. дан 6 м. гачани ташкил этган. Катталиги 120х140 м.ли ёдгорликнинг шарқий томонида йўлак бўлган. XII-XIII асрларга оид материал топилган.
2.45. Қулоқтепа Муротали-Бекобод йўлининг яқинида, Бўка-Бекобод автомобиль йўлидан 3,4 км. шарқда, Бўка тумани Ўзбековул қишлоғининг шимоли-шарқида жойлашган³. Кординатаси: 40°42'15.18" С; 69°15'4.05" В. 1968 йилда ЧҚАО томонидан қайд этилган. 2014 йили текширилганда илк ўрта асрларга оид икки дона йирик хажмли хум топилиб, Темурийлар тарихи давлат музейига топширилди. Ёдгорлик йирик истеҳком бўлиб, тўғри бурчак шаклида, майдони 1,60 (175х185 м.) га. Унинг шарқ томонда дарвоза, жануби-шарқида тўрт бурчакли мустакам истеҳкоми бўлган. Қаср атрофида хандақ излари ва унга қурилган кўприк қолдиқлари сақланган. Унинг Тошкентдан Фарғонага ўтадиган карвон йўлидаги қалъа бўлганлиги эҳтимоли бор.
2.46. Номсиз тураржойлар 1 Бўка харобасидан 0,8 км. шимолда жойлашган⁴. 1963 йилда ЧҚАО томонидан қайд этилган. У ерда 200х100 м. майдонда X-XI асрларга оид танга, сопол парчалари топилган.
2.47. Номсиз тураржойлар 2 Бўкадан 3,9 км. жануби-ғарбда, Қулдироқ қишлоғининг чеккасида, Гижиган ирмоғининг ўнг томонида, Бўка- Ҳўжақишлоқ автомобиль йўлининг шимолида жойлашган⁵. Кординатиси: 40°47'51.97'' С; 69°09'35.87'' В. 1966 йилда ЧҚАО томонидан қайд этилган. У баландлиги 8-9 м., атрофининг айланаси 186 м. ва майдони 0,25 га.ли овал шаклидаги алоҳида тепаликдан иборат. Унинг шимолидан, ҳамда шарқидан ғарб томонга оқадиган ариғи ўтган. Атрофи экин майдони ва уй-жойлар қурилиши натижасида ўзлаштирилган. VI-VIII асрларга оид сопол парчалари топилган.
2.48. Будалтепа Гижиган ирмоғининг ўнг қирғоғида, Бўкадан 4,5 км. жануби-ғарбда, Будал қишлоғининг шарқий чеккасида, Бўка-Ҳўжақишлоқ автомобиль йўлидан шимолда жойлашган. Кординатиси: 40°47'48.46'' С; 69°09'10.60'' В. 1966 йилда ЧҚАО қайд этган. Унинг сақланган умумий майдони 1,75 га., атрофининг айланаси 512 м.дан зиёдроқни ташкил этади. Харобанинг шимоли ва шарқидан ғарб томонга қараб оқадиган ариқ ўтган. Ёдгорлик икки қисмдан иборат. Шимол томонидан баландлиги 9-10 м.ли тепалик яъни, қаср ўрни сақланган. У айланасига хандақ билан ҳимояланган. Хандақ ичидаги майдон 0,45 га. атрофида. Қасрнинг жанубида тураржой истеҳкомларининг харобалари сақланган. Унинг атрофи экин майдони ва уй-жойлар қурилиши натижасида ўзлаштирилган. VI-VIII асрларга оид сопол бўлаклари топилган.
2.49. Ўрисмозортепа Бўка харобасидан 7 км. жануби-ғарбда, Қорабоғ қишлоғи яқинида, Гижиган ирмоғининг ўнг томонида, Бўка-Ҳўжақишлоқ автомобиль йўлидан шимолда жойлашган⁶. Кординатиси: 40°47'07.76'' С; 69°07'38.38'' В. 1966 йилда ЧҚАО қайд этган. Харобанинг умумий майдони 7,5 га.дан ортиқ бўлиб, у 4 қисмдан иборат. Шимолий бурчагида айлана шаклдаги хандақ билан ўраб олинган баландлиги 8-10 м., майдони 0,5 га.ли тепалик, ундан жануби-шарқда тўғри бурчакли тўртбурчак шаклдаги хандақ билан ўралган баландлиги 2-5 м.гача, майдони 0,67 га.ли тепалик ва бу тепаликнинг жанубида 2 га. дан ортиқ ва ғарбидан майдони 3,4 га.ли алоҳида муҳофазаланмаган тепаликлари сақланган. Бу ёдгорлик ҳозирда мусулмон ва христианларнинг қабристонига айлантирилган. Шу боис маҳаллий аҳоли томонидан Ўрисмозор деб юритилади.
2.50. Номсиз тепалик 23 Гижиган ирмоғининг ўнг томонида, Бўка- Сайхунобод автомобиль йўлидан 1,7 км. шимолда Янгитурмуш (аввалги Рамадон) қишлоғидан шарқда, Жамбил қишлоғи яқинида жойлашган¹. Кординатаси: 40°44'26.34"С; 69°05'59.75"В. 1966 йилда ЧҚАО томонидан қайд этилган. Бу алоҳида тепаликнинг баландлиги 7 м., майдони 0,3 га. атрофида бўлиб, ҳозирда унинг атрофи экин майдонларига айланган.