3 боб акушерлик қон кетишлари

Жамоада логистика ва коммуникация.
Ҳар қандай тиғиз вазиятда сифатли ёрдамнинг муҳим элементларини жамоа аъзолари ўртасидаги ўзаро самарали ҳамкорлик (коммуникация) ташкил этади. Жамоада самарали мулоқот қилишнинг қуйидаги тамойилларига амал қилиш зарур:

1. 
   Муаммони қисқача ифодалаш, бунда тафсилотларни назардан қочирмаслик керак (ТҚК ҳолати ҳақидаги маълумотда анамнезга оид қисқача маълумотлар ва ҳаётий муҳим кўрсаткичларнинг баҳоси келтирилиши керак).
   
2. 
   Жамоада бир-бирларига исмини айтиб мурожаат қилиш, визуал мулоқот мақсадга мувофиқ (у ёки бу тадбирни амалга ошириш ҳақидаги манзилсиз бақиришларга йўл қўйилмайди)
   
3. 
   Жамоанинг у ёки бу аъзосига қаратилган тавсияларни аниқ, қисқа, тушунарли тарзда ва хотиржам баён қилинг.
   
4. 
   Кўрсатмалари тушунарсиз бўлса, жамоа етакчисидан қайта сўранг.
   
5. 
   Жамоадаги ҳаракатларингизни ҳар доим овоз чиқариб айтинг (бу жамоанинг барча аъзоларига қандай тадбирлар бажарилгани, қайсилари бажарилмаганини билиш орқали вақтни тежаш имконини беради).
   

Базавий даволаш ва дастлабки баҳо.
ТҚК аниқланганидан сўнг, унга қарши кураш базавий даволашдан ва дастлабки баҳодан бошланиши керак.


Базавий даволаш ўз ичига қуйидагиларни қамраб олади:

1. 
   14-16 сонли катетерлар билан вена томирини катетеризация қилиш (ТҚК нинг ҳар қандай шаклида, АБ ва пульс кўрсаткичларидан қатъий назар, венага кириш кўпи билан 5 дақиқа ичида амалга оширилиши керак) (2-расм).
   
2. 
   Кристаллоидларни болюс киритиш: бир венага – натрий хлорнинг 1 литр ҳажмидаги физиологик эритмасини 15 дақиқа давомида, иккинчи томирга - 20-40 окситоцин бирлиги 1 литр натрий хлорид эритмасига 1 дақиқада 60 томчи тезлигида. ТҚК юзага келганда 2 та томирнинг катетеризацияси – бу акушерканинг бирламчи вазифаси. Томир ичига юбориш имкониятини тезда таъминлаш учун ҳар бир венани алоҳида акушерка катетерлаштириши керак (1 акушерка – 1 та томир)
   
3. 
   Кислородни маска орқали юбориш (10-15 л/дақиқа)
   
4. 
   Сийдик пуфагини катетеризация қилиш
   
5. 
   Қон кетишини тўхатиш бўйича вақтинчалик чоралар (қорин аортасини сиқиш ва бачадоннинг бимануал компрессияси)
   
6. 
   Тананинг оёқлар кўтарилган ва боши пастга эгилган ҳолатда ётқилиши (Тренделенбург ҳолати).