3 бўлим: Шўр ерларда доривор ўсимликларнинг интродукцияси ва биологик хусусиятлари

- Бўёқдор махсар - Сафлор красильный (Carthamus tinctorius L.).
Бўёқдор махсар - Asteraceae оиласига мансуб 1 йиллик ўт. Табиий ҳолда яккам - дуккам учрайдиган, қурғоқчил бўлган бу ўсимлик Циркумбореал (Жанубий Россия, Украина) ва Эрон-Турон флорасига мансубдир [http://ozon.shoptop.ru/detail.php?shop=3&id=1610509].
Доривор восита сифатида ўсимликнинг илдизи ва уруғи ишлатилиб, унинг таркибида флаваноидлар, ошловчи моддалар ва ёғлар мавжуддир. Халқ табобатида махсар ёғидан суяк касалликлари, бел оғриқ ва нафас йўлларининг яллиғланишининг олдини олишда ишлатилган. Шўр тупроқларда ўсимликлар уруғдан экилди. Ўртача шўрланган тупроқларда уруғ унувчанлиги -38,3% ва сақланиши -81,6% ни, кучли шўрланган тупроқларда эса бу кўрсаткичлар 40,2% ва 75,05% ни ташкил этди.
Ўсимликлар 2 хил шўрланишдаги тупроқларда ҳам жадал ўсди ва ривожланди. Ўртача шўрланган тупроқларда ўсимликларнинг асосий поялари 98,3±7,38 см ва улардаги барглар 39,5±7,07 та га етиб, 18,3±1,55 см гача ёғочланади. Асосий пояларда ўртача 17,0±2,34 та 1-тартибли новдалар ҳосил бўлиб, уларнинг узунлиги -38,3±2,89 см га, барглар сони 15,4±1,32 та га етади. Ҳар бир 1-тартибли новдаларда ўртача 9,2±0,86 та 2-тартибли новдалар шаклланади ва уларнинг узунлиги -19,22,87 см ни, барглар сони эса 11,4±2,29 та ни ташкил этади. Ўсимликлар июн ойининг охирида генератив даврга киради. Сентябр ойида 1 туп ўсимликда ўртача 47,2±5,53 та шаклланган тўп мевалар ва 40,4±2,44 та пишган тўп мевалар қайд этилган (3.8-жадвал).
Кучли шўрланган тупроқларда, ўсимликларнинг ўсиши ва ривожланиши нисбатан суст бўлсада, вегетация давомида уларнинг шўрга чидамлилик ҳусусиятлари намоён бўлади. Яъни, ўсимликлар жадал ўсиб асосий поялар 79,3±4,80 см ва улардаги барглар 32,0±2,19 та га етади. Асосий пояларда ўртача 30,1±1,62 та 1-тартибли новдалар ҳосил бўлиб, уларнинг узунлиги -11,2±1,77 см ни ташкил этади. Шунингдек, ҳар бир 1-тартибли новдаларда 12,4±0,81 та 2-тартибли новдалар ҳосил бўлади. Уларнинг узунлиги ўртача 14,7±1,54 см ва барглар сони 6,2±0,66 та га етганлиги қайд этилди. Ўсимликлар июл ойида генератив даврга киради. Сентябр ойида, 1 туп ўсимликда ўртача 32,0±4,22 та шаклланган мевалар ва 69,0±6,48 та пишган мевалар мавжуд эди. Бўёқдор махсарнинг ўсиши ва ривожланиши давомида шўрга чидамли ҳусусиятлари яққол намоён бўлади. Бу ўсимликни кучли шўрланишдаги тупроқларда экилганда, уруғ ҳосилдорлиги - 1,60±0,18 т/га ни ташкил этади (3.9-жадвал).