Ўзбекистон ресубликаси олий ва ўрта махсус таълим вазирлиги

Аффектив ўрганиш соҳаси муносабат, қадрият, интизомга нисбатан қараш, меҳнат хавфсизлиги, меҳнатга тайёргарлик каби эмоционал ҳолатларни ўз ичига олади. Албатта, ҳар бир модул бўйича бирон бир фаолият турини амалга оширишда риоя қилинадиган меҳнат хавфсизлиги ва меҳнатни ташкил этишга боғлиқ ўқув материаллари, кўрсатмалар ҳамда тавсиялар бўлиши керак.
Модулни ўқув мақсадларини белгилаш қуйидаги тоифаларни ўзида қамраб олиши тавсия этилди:
Билиш - бу далиллар ва тамойилларни эслаб қолиш ҳамда қайта хотирлашни билдиради. Бунда талаба ўзлаштирган билимларини эслаши ва уларни айтиб бериши мумкин.
Тушуниш - ўрганилган ўқув материалнинг моҳиятини тушуниш қобилиятининг кўрсаткичи бўлиб, бунда хулосалар чиқарилади, мавжуд вазият таҳлил қилинади. Тушуниш кўрсаткичи сифатида изоҳлаб бериш, материални қисқача ифода этиш ёки кейинги ҳодисалар тўғрисида таклифлар бериш ва ҳоказолар иштирок этади.
Методлар, қоидалар, умумий тушунчаларни қўллаш - бунга қоидалар, методлар, тушунчалар, принциплар, назарияларни қўллаш киради. Бунда ўқитиш натижалари ўқув материалини тушунишдан кўра юқори савияда ўзлаштиришни талаб қилади.
Таҳлил қилиш – бу бутунни элементларга бўла олиш, элементларнинг градацияси ва муносабатларни ўрната олиш, бутунни ташкил қилиш принципларини билиш. Бу ҳолда ўқув натижалари тушуниш ва қўллашга нисбатан ўзининг юқори интеллектуал савияси билан характерланади, чунки у ўқув материалининг мазмуни ва унинг ички тузилишини билишни талаб қилади.
Синтез - янги тузилмаларни ҳосил қилиш мақсадида берилган элементлардан бир бутунни яратиш. Мос натижалар янги схема ва структураларни яратишга йўналтирилган ижодий характердаги фаолиятни ифодалайди.
Баҳолаш - қабул қилинган мақсадларни ҳисобга олиб материаллар ва методларни баҳолаш. Бу категория барча олдинги категориялар ва аниқ ажралиб турган критерияларга асосланган баҳоловчи фикрлар бўйича ўқув натижаларига эришишни талаб қилади.
Ҳар бир модул бўйича таянч ибораларни алоҳида кўрсатиш лозим. Ҳар бир таянч иборани, ўрганилиш чуқурлигини ўрнатиш зарур бўлади. Яъни талаба қайсидир таянч иборани билиш даражасида, бошқасини қўллаш, айрим таянч ибораларни баҳолаш даражасида ўзлаштириши керак бўлади.