Ўзбекистон Республикасининг «Ҳуқуқбузарликлар профилактикаси тўғрисида»

Бир вақтнинг ўзида ўнлаб, юзлаб, минглаб, хаттоки, миллионлаб инсонларга профилактик таъсир кўрсатиш имкониятига эгалик – бунда ҳуқуқбузарликлар профилактикаси субъектлари жойларда учрашув, маъруза, давра суҳбати, конференция, семинар кабиларни ташкил этиш, газета ва журналларда мақолалар чоп этиш, профилактик мазмун ва тарбиявий аҳамиятга эга бўлган китобларни нашр эттириш, телеведениеда кўрсатувлар, фильмлар, намойиш қилиш, радиода эшиттиришлар қилиш, спектаклларни уюштириш орқали бир вақтнинг ўзида кўплаб аҳолига профилактик таъсир кўрсатади.
Келтириб ўтилган умумий профилактик мазмунга эга бўлган тадбирларнинг ҳар бири профилактик таъсир кўрсатиш доираси моҳиятига кўра турличадир. Мисол учун, ҳуқуқбузарликлар профилактикаси субъекти муайян меҳнат жамоаси, таълим муассасаси ёки маҳаллада учрашув ўтказиб, ҳуқуқбузарликнинг ижтимоий салбий аҳамияти, ҳуқуқий оқибати, жавобгарликнинг муқаррарлиги кабиларни етказиш орқали юз-икки юз аҳолига профилактик таъсир кўрсатса, радиоэшиттириш ёки телекўрсатув орқали минглаб, керак бўлса милионлаб аҳолига профилактик таъсир кўрсатиши мумкин. Шу боисдан, ҳуқуқбузарликлар профилактикаси субъекти мавзунинг қанчалик долзарблиги ва глобал аҳамиятга эгалиги ҳамда мавжуд куч ва воситаларга таянган ҳолда умумий профилактик мазмунга эга тадбирлардан бирини ёки бир нечтасини белгилаб олади ва амалга оширилишини таъминлайди.
Кам куч, вақт ва маблағ сарфланиши – айтайлик бир соатлик телекўрсатув орқали минглаб фуқароларга профилактик таъсир кўрсатиш учун ўн нафар кишининг меҳнати кифоя бўлса, айнан шу бир соатлик вақт оралиғида якка тартибдагт (индивидуал) профилактикани амалга ошириб, минглаб фуқароларга профилактик таъсир кўрсатиш учун юзлаб профилактика субъектларининг меҳнати талаб этилади. Агар бу бир киши томонидан амалга оширилса, бунинг учун ойлаб, йиллаб вақт сарфланиши мумкин. Бу борада маблағ сарфланиш ҳажмини ҳам худди шу суратда ошиши кузатилади;
Ҳуқуқбузарликлар профилактикасига комплекс ёндашилиши – ҳуқуқбузарликларнинг уму­мий профилактикаси чора-тадбирларидан бири ҳисобланган ҳуқуқбузарликлар профилактикасига доир давлат дастурлари ва бошқа дастурлар республика, вилоят, шаҳар, туман, маҳалла доирасида ишлаб чиқилиб, амалга оширилиши, дастурларда бир неча йўналишларда вазифаларнинг белгилаб олиниши умумий профилактиканинг комплекс ёндашилишини ўзида ифодалайди.