Ўзбекистон республикасининг қонуни

53-модда. Давлат фуқаролик хизматчиларининг ижтимоий ҳимояси
Давлат фуқаролик хизматчиларининг ижтимоий ҳимояси давлат томонидан таъминланади ва қуйидагилар кафолатланади:
давлат фуқаролик хизматчисининг пенсия таъминоти ва давлат фуқаролик хизматчиси вафот этган тақдирда, қонунда назарда тутилган тартибда, унинг оила аъзолари пенсия таъминоти;
давлат фуқаролик хизматчиси хизмати даврида ёки хизмати тугаганидан кейин ўз хизмат вазифаларини бажариши муносабати билан вафот этиши, унинг мол-мулкига ва соғлиғига зарар етиши, меҳнат қобилиятининг йўқотилиши ҳолатлари учун мажбурий давлат суғуртаси;
белгиланган тартибда тиббий хизмат кўрсатиш;
давлат фуқаролик хизматига кириш ёки давлат фуқаролик хизматчисини бошқа жойга ишга ўтказишдаги харажатлар ўрнини қоплаш;
қонун ҳужжатларида назарда тутилган бошқа ижтимоий ҳимоя чораларини тақдим қилиш.
Давлат фуқаролик хизматчисига унинг давлат фуқаролик хизматини ўташ шароитларига қараб, қонун ҳужжатлари билан белгиланган ҳолатлар ва тартибда, турар жой, хизмат транспорти ёки турар жой ва транспорт харажатлари учун пул компенсацияси берилади.
Давлат фуқаролик хизматчиларига Ўзбекистон Республикаси фуқароларига тўланадиган барча турдаги ижтимоий нафақалар қонун ҳужжатларида белгиланган асослар ва миқдорларда татбиқ этилади.
Нафақалар тўлови, Ўзбекистон Республикаси давлат бюджети маблағларидан амалга оширилади, Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси маблағлари ҳисобидан амалга ошириладиган тўловлар бундан мустасно.
 
54-модда. Давлат фуқаролик хизматчиларининг меҳнат ва ижтимоий таътиллари
Давлат фуқаролик хизматчиларига йигирма тўрт иш кунидан кам бўлмаган муддат билан ҳақ тўланадиган йиллик асосий таътил берилади.
Давлат фуқаролик хизматчиларига кўп йиллик хизмати ва ҳар кунги ишнинг алоҳида режими учун йиллик қўшимча ҳақ тўланадиган таътиллар берилади. Ушбу таътилларнинг ҳар бири камида уч иш кунидан кам бўлмаслиги лозим.
Кўп йиллик хизмати ва ҳар кунги ишнинг алоҳида режими учун йиллик қўшимча ҳақ тўланадиган таътиллар бериш тартиби ва давомийлиги Ўзбекистон Республикаси Вазирлар Маҳкамаси томонидан белгиланади.
Давлат фуқаролик хизматчиларининг алоҳида тоифалари учун қонун билан ҳар йиллик асосий ва қўшимча ҳақ тўланадиган меҳнат таътилининг бошқача давомийлиги белгиланиши мумкин.