Ўзбекистон республикасининг қонуни

4-модда. Асосий тушунчалар
Ушбу Қонунда қуйидаги асосий тушунчалар қўлланилади:
давлат фуқаролик хизмати – давлат органлари ва ташкилотларида оммавий манфаатлар йўлида Ўзбекистон Республикаси фуқароларининг ҳақ тўланадиган касбий фаолияти;
давлат лавозими – давлат вазифа ва функцияларини бажариш учун белгиланган доирадаги хизмат вазифа ва мажбуриятларига эга давлат органлари ва ташкилотлардаги лавозим;
давлат органи – давлат функцияларини бажариш учун давлат-ҳокимият ваколатларига эга Ўзбекистон Республикаси қонун ҳужжатларига асосан ташкил этилган муассаса;
давлат ташкилоти – оммавий манфаатлар йўлида белгиланган вазифа ва функцияларни бажаришга мўлжалланган давлат тасарруфидаги ташкилот;
давлат фуқаролик хизматчиси – давлат лавозимида фаолиятини амалга оширувчи Давлат лавозимлар реестрига қўшилган Ўзбекистон Республикаси фуқароси;
малакавий талаблар – маълум бир давлат лавозими ёки маълум бир малака даражасига номзод бўлган шахсларнинг таълим, иш тажрибаси ҳамда билим ва компетенциясига қўйилган талаблар;
давлат фуқаролик хизматчисининг касбий компетенцияси – зарур функционал вазифаларини самарали амалга ошириш учун билим ва кўникмаларнинг тўплами;
миллий кадрлар резерви – давлат фуқаролик хизматчиларининг марказлаштирилган танлаб олинишини таъминлайдиган, мансаб поғонасида ўсиши учун кўмак берадиган ва мониторинг олиб борадиган ягона кадрлар захираси реестри;
давлат фуқаролик хизматининг Давлат лавозимлари реестри – Ўзбекистон Республикаси Президенти томонидан тасдиқланадиган, давлат органлари ва ташкилотларидаги иерархик тарзда ташкил қилинган давлат лавозимларининг рўйхати;
давлат фуқаролик хизматчиларининг Одоб-ахлоқ қоидалари – давлат фуқаролик хизматчилари эгаллаб турган давлат лавозимидан қатъий назар риоя қилиши шарт бўлган касбий хизмат одоб-ахлоқ нормалари, принциплари ва қоидалари ҳамда хизмат хулқ-атвори асосий қоидалари тўплами.