Ўзбекистон республикасининг қонуни

46-модда. Давлат фуқаролик хизматчиларини қайта тайёрлаш
ва малака оширишини амалга оширувчи таълим муассасалари
Давлат фуқаролик хизматчиларини қайта тайёрлаш ва малакасини ошириш курслари Давлат фуқаролик хизматчиларини қайта тайёрлаш ва малакасини оширувчи таълим муассасалари реестрига киритилган илмий-тадқиқот, олий таълим муассасалари, шунингдек, нодавлат таълим муассасалари (кейинги ўринларда – таълим муассасалари) томонидан ўтказилади.
Давлат фуқаролик хизматчиларини қайта тайёрлаш ва малакасини ошириш бўйича таълим муассасалари реестри давлат фуқаролик хизмати масалалари бўйича ваколатли орган томонидан юритилади.
 
47-модда. Давлат фуқаролик хизматчиларини қайта тайёрлаш
ва малакасини оширишни молиялаштириш
Давлат фуқаролик хизматчиларини қайта тайёрлаш ва уларнинг малакасини ошириш тегишли давлат органи ва ташкилотининг буюртмаси асосида Ўзбекистон Республикаси бюджети маблағлари, Ўзбекистон Республикаси Президенти ҳузуридаги Давлат хизматини ривожлантириш агентлиги қошидаги Давлат хизматини ривожлантиришни қўллаб-қувватлаш жамғармасининг грант маблағлари, давлат органлари ва ташкилотларининг бюджетдан ташқари маблағлари, қонунчиликда тақиқланмаган бошқа манбалар ҳисобидан амалга оширилади.
Давлат фуқаролик хизматчиларини қайта тайёрлаш ва уларнинг малакасини ошириш давлат фуқаролик хизмати масалалари бўйича ваколатли органнинг бюджетдан ташқари маблағлари ҳисобидан грантлар ажратилиши мумкин.
Молиялаштириш, шунингдек давлат фуқаролик хизматчиларини қайта тайёрлаш ва уларнинг малакасини ошириш учун грантларни ажратиш тартиби қонун ҳужжатлари билан белгиланади.
 
48-модда. Давлат фуқаролик хизматчиларининг аттестацияси
Давлат фуқаролик хизматчиларининг аттестацияси қонун ҳужжатларида белгиланган тартибда уларнинг касбий компетенциясининг объектив даражасини баҳолаш, уларни малака талабларига лойиқлигини аниқлаш, унга юклатилган вазифа ва функцияларни бажаришда маъсулиятини ошириш мақсадида ўтказилади.
Давлат фуқаролик хизматчисининг аттестацияси уч йилда бир марта ўтказилади.
Давлат органи ва ташкилотларида аттестация ўтказишда аттестация комиссиялари ташкил этилади, уларнинг таркиби, фаолияти ва ишлаш тартиби давлат органлари ва ташкилотлари томонидан белгиланади.
Давлат фуқаролик хизматчиларининг аттестациясини ўтказиш тартиби, шунингдек аттестация комиссияларининг фаолияти ва ишлаш тартиби давлат фуқаролик хизмати масалалари бўйича ваколатли орган томонидан белгиланади.