Ўзбекистон республикасининг қонуни

41-модда. Давлат фуқаролик хизматчисининг мажбуриятларни бажариш билан боғлиқ бўлган масалалар бўйича шикояти ва унинг суд ҳимояси
Давлат фуқаролик хизматчиси давлат органлари ва ташкилотларининг ҳамда уларнинг мансабдор шахсларининг ноқонуний хатти-харакатлари (харакатсизлиги) устидан бўйсунув тартибидаги юқори турувчи давлат органи ва ташкилотига ёки қонун ҳужжатларида белгиланган тартибда судга шикоят қилиш ҳуқуқига эга.
 
42-модда. Хизмат низоларини кўриб чиқиш
Давлат фуқаролик хизматчиларнинг ҳуқуқи ва қонуний манфаатларига тегишли маъмурий ҳужжат ва маъмурий ҳаракатлар бўйича хизмат низолари Ўзбекистон Республикасининг “Маъмурий тартиб-таомиллари тўғрисида”ги Қонуни ва Ўзбекистон Республикаси Маъмурий жавобгарлик тўғрисидаги кодексида белгиланган тартибда кўриб чиқилади.
43-модда. Давлат фуқаролик хизмати соҳасида мониторинг
Давлат фуқаролик хизмати соҳасида норматив-ҳуқуқий ҳужжатлари қўллашда ягона амалиётни жорий этиш мақсадида давлат фуқаролик хизмати масалалари бўйича ваколатли орган томонидан давлат фуқаролик хизмати cоҳасида мониторинг (кейинги ўринларда – мониторинг деб юритилади) ўтказилади.
Мониторинг давлат органлари ва ташкилотларида фуқаролик хизмати соҳасидаги қонун ҳужжатларини қўллашни ўрганиш йўли билан амалга оширилади.
Мониторинг ўтказишнинг қуйидаги турлари ўрнатилади:
ташкил этиш шаклига қараб – режали, режадан ташқари, такрорий ва бир марталик;
текшириладиган масалалар ҳажмига қараб – комплекс ёки мавзуга доир;
ўтказиш жойига қараб – камерал ёки сайер.
Мониторинг давлат фуқаролик хизмати масалалари бўйича ваколатли орган томонидан тасдиқланадиган график-режа асосида амалга оширилади.
Мониторинг ўтказиш натижалари бўйича маълумотнома тузилади, унда мониторинг натижалари, хулосалар, белгиланган муддатларда камчиликларни (агар мавжуд бўлса) бартараф этиш бўйича тавсиялар кўрсатилади.
Маълумотнома нусхаси юқори турувчи давлат органи ва ташкилоти, Ўзбекистон Республикаси Вазирлар Маҳкамасига (зарур бўлса) юборилади ҳамда давлат фуқаролик хизмати масалалари бўйича ваколатли орган расмий веб-сайтига жойлаштирилади.
Ўтказилган мониторинг натижалари давлат органи ва ташкилотининг ҳайъат мажлисларида муҳокама қилинади.
Мониторинг ўтказиш тартиби давлат фуқаролик хизмати масалалари бўйича ваколатли орган томонидан тасдиқланади.