Ўзбекистон Республикасини янада ривожлантириш бўйича Ҳаракатлар стратегияси тўғрисида

Солиқ текшируви материаллари қонун талаблари асосида расмийлаштирилиши керак.


Низонинг моҳияти:
Қўзғатилган жиноят иши бўйича АЖ ва унинг таркибига кирувчи хўжалик юритувчи субъектларнинг молиявий-хўжалик фаолиятида солиқ қонунчилигига риоя этилиши юзасидан ҳужжатли тафтиш тайинлаш тўғрисида қарор қабул қилинган.
Ушбу қарор ижросини таъминлаш мақсадида вилоят Давлат солиқ бошқармасининг буйруғи чиқарилиб, АЖнинг фаолиятида солиқ қонунчилигига риоя этилганлиги ҳолати юзасидан ҳужжатли текшириш ўтказилган.
Текшириш давомида ўтказилган хатлов натижасида кирим ҳужжатлари мавжуд бўлган жами 6 494 300 сўмлик товар-моддий бойликлар йўқлиги ва шу миқдорда камомадга йўл қўйилганлиги, нотурар жой объектлар ижараси бўйича ижарачилардан олинган 8 200 000 сўм миқдоридаги маблағ банк муассасасига топширилмасдан, мақсадсиз сарфланганлиги, нақд пул маблағларининг банкдан ташқари айланишини қисқартиришга доир Ўзбекистон Республикаси Вазирлар Маҳкамасининг 2002 йил 5 августдаги 280-сонли қарори талабларининг бузилишига йўл қўйилганлиги қайд этилган далолатнома тузилган.
Текшириш далолатномаси текширувчи ва текширишда иштирок этган солиқ тўловчи мансабдор шахси томонидан имзоланган ва бир нусхаси АЖда қолдирилган.
Солиқ текшируви материаллари туман ДСИ бошлиғининг биринчи ўринбосари бошчилигида туман ДСИ ходимлари иштирокида кўриб чиқилган ва баённома расмийлаштирилган. Йиғилиш якунига кўра, АЖга нисбатан Солиқ кодексининг 114,119-моддаларига мувофиқ молиявий жарима қўллаш лозимлиги баённомада кўрсатилган ҳамда АЖда ўтказилган текширув далолатномаси бўйича қарор лойиҳасини тайёрлаш Солиқ ва мажбурий тўловлар тушумларини ҳисобга олиш, таҳлил қилиш, маълумотлар базасига хизмат кўрсатиш бўлими бош давлат солиқ инспектори зиммасига юклатилган.
ДСИнинг қарорида кўрсатилган молиявий санкция суммаси АЖ томонидан тўланмаганлигини асос қилиб, ДСИ вилоят хўжалик (ҳозирда иқтисодий) судига даъво аризаси билан мурожаат қилиб, унга нисбатан Ўзбекистон Республикаси Солиқ кодексининг 114-моддасига ва 119-моддасига асосан жами 20 614 300 сўм молиявий санкция қўллашни сўраган.

ДСИ (аризачи)нинг важлари:

АЖ томонидан солиқ қонунчилиги талаблари бузилганлиги барча далиллар билан тўлиқ тасдиқланган. Шунинг учун ариза тўлиқ қаноатлантирилиши лозим.

АЖ (жавобгар)нинг важлари:

ДСИ томонидан қабул қилинган қарор қонун талабларига жавоб бермайди. АЖга нисбатан қўллаш сўралган молиявий санкциянинг аниқ ҳисоб-китоби мавжуд эмас. Шу сабабли ДСИнинг аризасини қаноатлантириш рад этилиши лозим.