Ўзбекистон Республикасини янада ривожлантириш бўйича Ҳаракатлар стратегияси тўғрисида

Низонинг моҳияти
Шўъба корхонаси (лизинг берувчи) ва фермер хўжалиги (лизинг олувчи) ўртасида лизинг шартномаси тузилган. Шартнома шартларига кўра лизинг берувчи “Доминатор-130” русумли бир дона ғалла ўриш комбайнини эгалик қилиш ҳамда фойдаланиш учун келгусида сотиб олиш ҳуқуқи билан лизинг олувчига лизингга бериш, лизинг олувчи эса қишлоқ хўжалиги техникасини қабул қилиб олиш, шартноманинг иловасида кўрсатилган график асосида лизинг тўловларини ҳар 6 (олти) ойда белгиланган миқдорда тўлаб бориш мажбуриятини олган.
Шунингдек, лизинг шартномасида кўрсатилган мажбуриятлар бажарилишини таъминлаш мақсадида лизинг берувчи, лизинг олувчи ва “Навоий Трактор” МЧЖ ўртасида гаров шартномаси тузилган. Гаров шартномасининг шартларига асосан МЧЖ томонидан “ВТ-150” русумли, 2007 йилда ишлаб чиқарилган занжирли трактор гаровга қўйилган.
Лизинг шартномасига асосан 2010 йил 11 июнда лизинг берувчи лизинг объектини тегишли тартибда лизинг олувчига топширган.
Бироқ, лизинг олувчи томонидан лизинг шартномасида белгиланган тартибда тўловлар ўз вақтида амалга оширилмаган ва натижада лизинг берувчи олдида 25 730 073 сўм қарздорлик вужудга келган.
Шу боис Ўзбекистон Савдо-саноат палатаси лизинг берувчи манфаатида судга даъво аризаси билан мурожаат қилиб, лизинг олувчидан 11 900 978 сўм асосий қарз, 8 335 088 сўм фоиз ва 5 494 007 сўм пеня ундиришни, ундирувни гаровга қўйилган мулкка қаратишни ҳамда лизинг шартномасини бекор қилиб, лизинг объектини қайтаришни сўраган.


Ўзбекистон Савдо-саноат палатасининг важлари
Лизинг берувчи ва лизинг олувчи ўртасида “Доминатор-130” русумли бир дона ғалла ўриш комбайнини лизингга олиш тўғрисида шартнома тузилган.
Лизинг берувчи томонидан шартнома шартлари тўлиқ бажарилган, яъни лизинг объекти 2010 йил 11 июнда лизинг олувчига тегишли тартибда топширилган.
Бироқ лизинг олувчи томонидан эса шартнома шартлари лозим даражада бажарилмаган натижада лизинг олувчининг лизинг берувчи олдида 25 730 073 сўмлик қарздорлиги вужудга келган.
Лизинг берувчи Ўзбекистон Савдо-саноат палатаси аъзоси ҳисобланганлиги боис палатага мурожаат қилиб, қарздорликни ундириш бўйича амалий ёрдам кўрсатишни сўраган.
Шу сабабли Ўзбекистон Савдо-саноат палатаси ўзининг аъзоси ҳисобланган лизинг берувчи манфаатида судга мурожаат қилган.
Лизинг олувчининг қарздорлиги мавжудлиги сабабли даъво талабларини қаноатлантириш лозим.