Ўзбекистон Республикасини янада ривожлантириш бўйича Ҳаракатлар стратегияси тўғрисида

Низонинг моҳияти
Банк (даъвогар) ҳамда масъулияти чекланган жамияти (жавобгар) ўртасида кредит шартномаси тузилган.
Кредит шартномаси бўйича мажбуриятларнинг бажарилишини таъминлаш мақсадида даъвогар ҳамда жавобгар ўртасида 2011 йил 27 декабрда ва 2012 йил 20 январда гаров (ипотека) шартномалари тузилган.
Мазкур шартномаларга кўра жавобгарга тегишли бўлган қиймати 375 000 000 сўмлик 2 та савдо дўконлари гаровга қўйилган.
Кредит шартномасига кўра даъвогар жавобгарга йиллик 20 фоиз миқдорда устама ҳақ тўлаш шарти билан 3 йил муддатга 300 000 000 сўм миқдорида кредит маблағларини ажратган.
Мазкур шартномага биноан жавобгар кредит суммаси ва унга ҳисобланган фоизларни кредит шартномасида кўрсатилган тўлов жадвалига асосан тўлаб бориш мажбуриятини олган. Бироқ жавобгар томонидан тўловлар ўз вақтида амалга оширилмаган.
Шу сабабли Савдо-саноат палатаси даъвогар манфаатида судга даъво аризаси билан мурожаат қилиб, жавобгардан муддатидан олдин 307 037 789,35 сўм, шу жумладан 2012 йил 24 августга қадар ҳисобланган 7 037 789,35 сўм банк фоизини ундиришни ҳамда ундирувни гаров (ипотека) нарсасига қаратишни сўраган.
Суднинг ҳал қилув қарори билан даъво қаноатлантирилиб, жавобгардан даъвогар фойдасига 307 037 789,35 сўм ундирилган ва ундирув гаров (ипотека) нарсасига қаратилиб, гаровга қўйилган мол-мулкнинг кимошди савдоси бошланадиган вақтдаги бошланғич сотиш баҳоси 375 000 000 сўм миқдорида белгиланган.
Ҳал қилув қарори қонуний кучга киргач ижро варақаси берилган ва уни асосида давлат ижрочилари томонидан ижро иши қўзғатилиб, ижро ҳаракатлари олиб борилган.
Суд ҳал қилув қарорининг ижроси 2013 йил 29 апрелга қадар таъминланмаган.
Шу сабабли даъвогар жавобгарга нисбатан судга мурожаат қилган ҳамда 2012 йил 25 августдан 2013 йил 29 апрелга қадар бўлган давр учун 41 136 120,19 сўм банк фоизларини ундиришни сўраган.


Даъвогарнинг важлари
Биз ҳамда жавобгар ўртасида кредит шартномаси тузилган.
Даъвогар томонидан шартнома мажбуриятлари лозим даражада бажарилган, яъни жавобгарга йиллик 20 фоиз миқдорда устама ҳақ тўлаш шарти билан 3 йил муддатга 300 000 000 сўм миқдорида кредит маблағлари ажратилган.
Жавобгар томонидан эса кредит суммаси ва унга ҳисобланган фоизларни кредит шартномасида кўрсатилган тўлов жадвалига асосан тўлаб бориш мажбурияти лозим даражада бажарилмаган.
Натижада жавобгарнинг даъвогар олдида қарздорлиги вужудга келган ҳамда суднинг ҳал қилув қарори билан жавобгардан даъвогар фойдасига 307 037 789,35 сўм, шу жумладан 2012 йил 24 августга қадар ҳисобланган 7 037 789,35 сўм миқдоридаги банк фоизи ундирилган.
Ҳал қилув қарорининг қабул қилинганига қарийб бир йил тўлган бўлишига қарамасдан унинг ижроси 2013 йил 29 апрелга қадар таъминланмаган.
Шу сабабли 2012 йил 25 августдан 2013 йил 29 апрелга қадар бўлган давр учун жавобгардан даъвогар фойдасига 41 136 120,19 сўм банк фоизларини ундириш лозим.