Zbekiston respublikasi oliy va o ‗ rta maxsus ta`lim vazirligi

G„AZAL SEHRIGA OSHUFTA O„LMAS QO„SHIQLAR 

Munavvar PARDAYEV,  

O„zbek tili va adabiyoti kafedrasi o„qituvchisi (GulDU) 

Abdurahim SULTONOV, 

 Musiqiy ta`lim kafedrasi o„qituvchisi (GulDU)

 

 

Betakror  she`riyati  bilan  xalqimiz  yuragidan  mustahkam  o‗rin  olgan  Erkin 

Vohidov  ijodiy  qudrati  sarchashmalarini  mumtoz  adabiyotdan,  uning  buyuk 

allomalari  asarlaridan  qidirmoq  joizdir.  Mir  Alisher  Navoiy,  Fuzuliy,  Hofiz, 

Bedildan  tortib  to  Muqimiy  va  Furqatlargacha  bo‗lgan  ulug‗  allomalarning 

g‗azaliyoti juda yosh paytlaridan uning qalb torlarini chertgan.  

 

Ularni  sevib  mutolaa  qilish  bilan  birga  aruz  sehriga,  uning  musiqaga 

hamohang  jozibasiga  lol  qolgan.  Garchi,  shoirning  g‗azalnavislik  mahorati 

oltmishinchi  yillardan  ko‗zga  tashlangan  bo‗lsada,  Erkin  Vohidov  ijod  olamiga 

kirgan  dastlabki  paytlardayoq  mumtoz  she`riyat  borasida  ma`lum  darajada  nom 

qozonishi  mumkin  edi.  Biroq  o‗sha  yillarda  she`riyatda  fuqarolik  pafosi  kuchli 

bo‗lishi,  sotsialistik  realizm  g‗oyalari  barqaror  ifoda  etilishi  lozimligi  asosiy 

aqidaga  aylangan,  hatto  G‗afur  G‗ulom,  Abdulla  Qahhor,  Asqad  Muxtor  kabi 

atoqli  adiblar  ham  aruzni  tarix  g‗aladoniga  tashlab  qo‗yish,  unga  arxaik  janr 

sifatida qarash kerakligi haqida katta-katta minbarlardan turib baralla gapirishardi. 

Ular  ―o‗zbek  adabiyotiga  aruz  kerakmi  o‗zi?‖  degan  andishada  turgan  bo‗lsa, 

adabiyotimizning  yirik  vakillaridan  yana  bir  katta  guruhi  (masalan,  Sharof 

Rashidov) mumtoz she`riyat bugungi adabiyot ichida o‗zining munosib o‗rniga ega 

bo‗lishi  lozim  degan  fikrda  sobit  turdilar.  Haqiqatan  ham,  she`riyatning  gultoji 

hisoblangan,  o‗lmas  merosimiz  yaratilgan  go‗zal  va  o‗ynoqi  janr  hisoblanmish 

aruzdan voz kechish oson ish emas.  

O‗zingiz  o‗ylab  ko‗ring,  butun  g‗arb  she`riyati,  Gyote,  Pushkin  kabi  daho 

ijodkorlar  havas  qilgan  aruzga  nega  endi  o‗zimiz  o‗gay  ko‗z  bilan  qarashimiz 

kerak?  Albatta,  aruzga  qarshi  turganlarning  ham  o‗ziga  yarasha  jiddiy  sabab  va 

vajlari yo‗q emasdi.  

Yigirmanchi  asrning  birinchi  yarmi  o‗zbek  adabiyotida  aruzda  yaratilgan 

kuchli zamonaviy asarlar barmoq bilan sanarli edi desak, xato bo‗lmasa kerak. Bu 

yo‗nalishda  ijodkor  ko‗p  edi,  biroq  shaklbozlik,  mazmunan  sayoz,  o‗ldim-

kuydimdan  nari  o‗tmaydigan,  yurakdan  joy  olmaydigan  g‗azallar  ham  ko‗paydi. 

Shunday  bir  vaqtda  Erkin  Vohidov  o‗zining  aruzini  u  g‗oyat  dilbar  bo‗lsa-da, 

she`riyat maydoniga ehtiyotkorlik bilan chiqardi:  

 

Istadim sayr aylamoqni men g‗azal bo‗stonida, 

 

Kulmangiz ne bor senga deb mir Alisher yonida... 

---

357 

 

Biroq  shoirning  bu  kamtarona  baytiga  ehtiyoj  yo‗q  ekan.  Shoir  g‗azaliyoti 

o‗zbek  adabiyoti  osmonida  portlagan  bomba  effektini  berdi.  Uning  ilk 

g‗azallariyoq  jurnallarku  mayli,  eng  yetakchi  partiyaviy  gazetalarda  ham  sahifa-

sahifa  e'lon  qilinadigan  bo‗ldi.  Erkin  Vohidov  g‗azallaridan  tashkil  topgan  ilk 

to‗plam  –―Yoshlik  devoni‖  (1965  y.)  chop  etilishi  bilan  undagi  deyarli  barcha 

she`rlar  yetakchi  kompozitorlar,  mashhur  qo‗shiqchilar  repertuaridan  joy  oldi. 

O‗zbek  adabiyotshunosligi,  adabiy  tanqid  guvillab  ketdi.  Erinmagan 

adabiyotshunos  borki,  vaqtli  matbuotda,  ilmiy-adabiy  anjumanlarda  munosabat 

bildirdi. Xo‗sh, buning sababi nimada deb o‗ylaysiz? Axir bu vaqtda shoir o‗zining 

barmoq  janridagi  ijodi  bilan  ham  ancha  tanilib  qolgan,  Mirtemir  kabi  atoqli 

shoirlar  nazariga  tushgan  edi-ku!  Aruzda  qalam  tebratayotgan  Habibiy,  Sobir 

Abdulla, Vohid Sa'dulla kabi o‗nlab ijodkorlar chop etayotgan devonlar kammidi? 

Erkin  Vohidovning  g‗azaliyoti ikki-uch  yildayoq  ming-minglab  yuraklarning  tub-

tubidan joy olgani siri nimada? Gap shundaki, shoir ijodkor ahli avvalo o‗z tarixiy 

ildizlaridan ozuqa olishi kerak degan andisha bilan yashadi va qalam tebratdi.  

 

Menga Pushkin bir jahonu menga Bayron bir jahon, 

 

Lek Navoiydek bobom bor, ko‗ksim osmon, o‗zbegim 

degan  satrlarni  shoir  shunchaki,  o‗zbekligini  ko‗z-ko‗z  qilish  uchungina 

bitmagan,  albatta.  Bugun  adabiyot  maydonida  biron  natijaga  erishaman  degan 

ijodkor  uch  manbadan  ozuqa  olishi  shart,  deb  hisoblardi  u.  Oziqlanish  shart 

bo‗lgan bu uch manba – o‗zbek, fors-tojik va arab tillari. Bu haq gap, zero, butun 

turkiy mumtoz adabiyot ana shu uch manba ustiga qurilgan. Shoirning  o‗zi turkiy 

mumtoz  she`riyat  bilan  birga  Rumiy,  Hofiz,  Bedil  kabi  forsiyda  qalam  tebratgan 

buyuk  shoirlar  merosini  ixlos  bilan  o‗rgandi,  aruzda,  asliyatdagi  ma`nosidan 

zarracha kam bo‗lmagan tarjimalar qildi. Mana bu baytlarni o‗qisangiz, fikrimizga 

ishonch hosil qilasiz: 

 

 

Parishon xotirim deb g‗am yaralmish, 

 

 

Yana chashmim tufayli nam yaralmish. 

 

 

Qilur mavj gavharu oina javhar, 

 

 

Ajab, beorzu dil kam yaralmish. 

 

 

Atarlar g‗uncha poymolini gul deb, 

 

 

Ne hol, shodlik aro motam yaralmish. 

 

 

Sabo to‗zg‗itgudek bir kaft tuproq 

 

 

Qo‗shilgach qon ila, odam yaralmish... 

Naqadar  go‗zal,  ayni  vaqtda  naqadar  o‗zbekona  satrlar.  Buyuk 

ajdodimizning forsiy merosini shu qadar silliq, shu qadar teran, purma`no va sodda 

tarzda o‗zbekchalashtirilganki, g‗azalning forsiy variantini o‗qib, uning ma`nosiga 

zarracha  putur  yetmaganini  ko‗rasiz.  Shoir  ijodiga  xos  go‗zal  tashbihlar,  so‗z 

o‗yinlari,  haqiqiy  san`at  darajasiga  ko‗tarilgan  quyma  iboralar  shundan  dalolat 

beradiki,  u  o‗z  hayoti  davomida  yuqorida  tilga  olingan  uch  ulug‗  chashmadan 

qonib-qonib suv ichdi. Bu obihayotdan yaralgan sohir g‗azaliyotini xalqimiz ustiga 

erinmay sochdi, yuragiga joyladi.  

Erkin  Vohidov  she`riyatining  yana  bir  qudrati  uning  xalqona,  mumtozona 

ohanglarida, o‗ynoqi,  jilvagar  ekanligida. Biz  yuqorida  ta`kidlaganday  uning  aruz 

---

358 

 

va barmoq tizimida yaratilgan yuzlab  she`rlari kuyga solindi, mumtoz,  an`anaviy, 

zamonaviy  qo‗shiq  ustalari  tomonidan  zavq  bilan  ijro  etildi,  xalqimizning 

olqishlariga  sazovor  bo‗ldi.  Sabab  -  bu  she`rlarda  so‗z  san`atining  fusunkor 

jozibasi  qiyomiga  yetkazib  ifoda  etilganida,  bir  so‗z  bilan  aytganda  -  shoirning 

mahoratida.  ―Qadim  zamonlardan  she`riyat  bilan  musiqa  bir  onaning  ikki  egiz 

farzandi  kabi  o‗xshash  va  yaqin,  bir  zarvaraqning  ikki  sahifasi  kabi  tutash  va  bir 

butun  bo‗lib  kelgan. Hali  kitobat  san`ati  dunyoga  kelmagan  zamonlarda, odamlar 

xarsang  toshga  shakllar  chizib  yurgan  paytlarda  xalqning  dardi,  armoni  bo‗lgan 

she`riyat musiqa qanotida parvoz qilib yurgan, - deydi shoirning o‗zi. – Rudakiy va 

Hofizning, Navoiy va Fuzuliyning o‗lmas baytlari ham xalq orasiga qo‗shiq bo‗lib 

tarqalgan,  qo‗shiq  qanotida  minglar,  millionlar  yuragiga  kirib  borgan.‖  (Erkin 

Vohidov. Qo‗shiq umri poyidor. Ziyouz.uz. 01.12.2015).  

Erkin Vohidov she`riyatidan dunyoga kelgan qo‗shiqlar mundarijasiga nazar 

tashlasangiz,  ularning  birontasi  ham  buyurtma,  yoki  biron  sana  munosabati  bilan 

yaratilmaganligiga  ishonch  hosil  qilasiz.  Xalqimiz  sevgan  xonandalarning  deyarli 

barchasi bu betakror she`riyatdan betakror qo‗shiqlar yaratishga ulgurdi. Bu borada 

ustoz san`atkor, O‗zbekiston va Tojikiston xalq artisti Sherali Jo‗raevning barakali, 

unumli  faoliyat  ko‗rsatayotganini  alohida  ta`kidlash  joiz.  So‗z  jozibasini,  she`r 

sehrini chuqur anglaydigan, o‗zi ham kezi kelganda dilbar she`rlar yarata oladigan 

hofiz ilk qo‗shiqlaridayoq Erkin Vohidov ijodiga murojaat qilgani sir emas. 

Yetmishinchi, saksoninchi yillarda ―Yoshlik devoni‖dagi eng sara  g‗azallar 

asosida  dunyo  ko‗rgan  qo‗shiqlar  Sherali  Jo‗raev  repertuaridan  mustahkam  joy 

olgan,  havaskor  san`atkorlar,  butun  xalq  tomonidan  sevib  kuylangan.  O‗zbek 

qo‗shiqchilik  san`atining  oltin  fondidan  joy  olgan  bu  qo‗shiqlar  hozir  ham  tildan 

tushmay  kelyapti.  ―O‗zbegim‖  qasidasini  oling.  Bu  g‗azal  ―Yoshlik  devoni‖da 

e'lon  qilinganda  aruzga  ―arxiv  she`riyati‖  deb  qarovchi  ayrim  adabiyotshunoslar 

tomonidan  uncha  xush  ko‗rmay,  oddiy,  jo‗n  she`r  sifatida  qabul  qilingan  edi 

(masalan,  adabiy  tanqidchi  Norboy  Xudoyberganovning  yetmishinchi  yillar 

matbuotidagi  chiqishlarida).  Lekin  g‗azal  ham,  qo‗shiq  ham  yarim  asrdan  ziyod 

vaqtdan  beri  xalq  og‗zidan  tushmay  kelayotgani  bunday  adabiyotshunoslarning 

fikri xato ekanligini ko‗rsatmaydimi! 

 

Tarixingdir ming asrlar ichra pinhon, o‗zbegim. 

 

Senga tengdosh Pomiru Oqsoch Tiyonshon, o‗zbegim. 

 

So‗ylasin Afrosiyobu so‗ylasin Urxun xati, 

 

Ko‗hna tarix shodasida bitta marjon, o‗zbegim. 

Bu  baytlar  nafaqat  bu  ikki  ijodkorga  shon  –  shuhrat  keltirdi,  balki  kurrai 

zaminimizda o‗zbekman deb yashayotgan, tomirida o‗zbek qoni oqayotgan barcha 

insonlarga  o‗zlarining  o‗zbek  ekanligini  his  etish  baxtini  ham  berdi.  Aytib  ado 

qilolmaydigan  tariximizni,  buyuk  ajdodlarimizni,  o‗chmas  qadriyatlarimizni 

bildirishdi,  yodimizga  keltirishdi  bu  ikki  alloma  zamondoshimiz.  Shularning 

borligi,  yozgan  nomalari,  aytgan  qo‗shiqlari  ruhiyatimizni  osmon  qadar 

yuksaklantirayotganligi – bu bizning iqbolimizning ham balandligidir. 

 

Men buyuk yurt o‗g‗lidurman, men bashar farzandiman. 

 

Lekin avval senga bo‗lsam, sodiq o‗g‗lon, o‗zbegim. 

---

359 

 

Bunday baytlarni o‗qib, tinglab, badanimiz jimirlab ketmaydimi? Bitta ta'rif 

bilan aytganda, ―O‗zbegim‖ qasidasi millat sha'niga qo‗yilgan haykal emasmi!  

Ustoz  Sherali  Jo‗raevning  yakkaxon  kontserti  dasturidagi  barcha  qo‗shiqlar 

tinglovchini  rom  qilmay  qo‗ymaydi,  albatta.  Ijrochining  mahorati  shundaki,  u 

murakkab janrdagi mumtoz g‗azallarni ham xalqqa tushunarli tarzda yetkaza olish 

qobiliyatiga  ega.  Buning  uchun  u  she`rda  aytmoqchi  bo‗lingan  fikrni  avvalo  o‗zi 

chuqur anglab yetadi, shundan so‗nggina qo‗shiq yaratishga kirishadi.  

Bu  o‗rinda  ―Yor  yiroqqa  yo‗l  olur‖  qo‗shig‗i  alohida  o‗rin  egallaydi. 

Navoiyning nafis bir g‗azaliga O‗zbekiston xalq shoiri Erkin Vohidov muxammas 

bog‗lagan bu qo‗shiq avvalroq, 1989 yilda suratga olingan ―Sherali va Oybarchin‖ 

badiiy fil`mida ham Sherali Jo‗raev tomonidan ijro etilgan edi. 

 

Ayriliq oni yaqindur, kema yo‗l bongin chalur. 

 

Vah meni tashlab firoqqa, yor yiroqqa yo‗l olur. 

 

Jon borib jono bila, sohilda bir jismim qolur. 

 

Mavj ila daryo kibi, oshifta qalbim qo‗zg‗olur. 

 

Vah meni tashlab firoqqa, yor yiroqqa yo‗l olur. 

Qo‗shiqning  g‗amnok  so‗zlariga,  ayriliq  oldidan  oshiq  chekayotgan  afg‗on 

ifodalangan  satrlarga  ko‗z  tiking.  Muxammas  talablariga  ko‗ra  ularning  dastlabki 

uch  qatori  Erkin  Vohidov,  keyingi  ikki  qatori  esa  Alisher  Navoiy  qalamiga 

mansub. Ditqqat qilsangiz satrlardan birontasida ham  ma`no uzilishini sezmaysiz. 

Buning  ustiga  Erkin  Vohidov  buyuk  allomaning  baytida  ifodalangan  chuqur  dard 

ifodasini kamoli mahorat bilan ifoda eta olgan.  

Boshqacha  aytganda,  muxammasning  beshala  satri  ham  she`r  ma`nosini 

to‗ldirishga,  yaxlit  bir  beshlikka  xizmat  qiladi.  Bu  Erkin  akaning  o‗z  ma`naviy 

ustoziga naqadar yaqin darajada ijod qilish maqomiga yetishganini ko‗rsatadi. Endi 

qo‗shiqqa  kelsak.  Hofizimizning  beqiyos  shirali  ovozi,  musiqaning  oshiqlarning 

ayriliq  oldidagi  holatini  beruvchi  mungli  nolasi  tinglovchi  ko‗z  o‗ngida  ―ishqiy 

kechinmalarni,  ikki  sevishgan,  sevilgan  dillarning  o‗ziga  xos  armonli  dunyosini 

namoyon qiladi. Ishq – bu shundayin bir ne'matki, har kim ham muhabbatning  

sehrli olamiga bexos kira olmaydi. Har qanday sevgan kishiga ham uning ―Bog‗i  

Eram‖lardagiday  hushbo‗y  iforlarini  hidlash  nasib  qilmas,  har  kimni  ham  bu  o‗t 

yondirmaydi.  Jondan  kechmasang,  oh  –  dod  urmasang,  ko‗z  yosh  to‗kmasang, 

demakki, sevmagansan, kuymagansan. 

 

Men necha aydim ko‗ngul, jondan kechib yor sevma deb. 

 

So‗ng yiroqqa ketsa tashlab, urma oh-dod dema deb. 

 

Ketdi yor – bas endikim, aytdi yoshingni tiyma deb. 

 

Yig‗lama ey ko‗z nadin, sohilg‗a chiqmas kema deb. 

 

Ko‗z yoshing daryo bo‗lib, har sorikim el ko‗z solur.  

Yana o‗sha kechmish... yana ayriliq, yana firoq, yana bularning hammasiga 

birgina  davo  –  sabr.  Yig‗lamoqdan  sira  foyda  yo‗q,  o‗rtada  oqar  daryo  –  ul  oy 

kemada. Shukurlar bo‗lsinkim, sabr mavjud, sabr kangulda, kangul ul oyda, ul oy 

kemada. 

Vidolashuv  chog‗idagi  bu  ohu  ko‗zning  mungrayib,  termulib  turishi  –  har 

qanday sabrlining ham ―jonini oladi‖.  

---

360 

 

 

Ey falak bas yig‗lama, yo‗q foyda, ul oy kemada. 

 

O‗rtada daryoyu men bu joyda, ul oy kemada. 

 

Kelmas endi oyda ne, ming oyda, ul oy kemada. 

 

Sabr kangulda, kangul ul oyda, ul oy kemada. 

 

Vahki borib, termulib, ko‗z mungrayib jonim olur. 

Qo‗shiqning  so‗nggi  bandlari  oralig‗idagi  musiqaning  nolishi  -  shunchalar 

mungli, shunchalar mahzun, shunchalar mayusdan – ma`yus-ki, tinglovchining bu 

g‗amzada  ohanglarni  malolsiz  tinglashi  ham  shunchalar  mushkuldan  –  mushkul. 

Muxammas  so‗ngida  Navoiyning  xulosasiga  hamohang  tasavvufona  bitiklar 

ko‗ramiz. G‗azal maqtasi fano bahri Navoiy ilkiga (qo‗liga) boda kemasini olgach, 

g‗am  varag‗idan  chaqinlar  chaqishi  bilan  yakunlanadi.  Menga  jonim  haqi  – 

qadahni  ber,  ey  piri  dayr,  deya  xitob  qiladi  shoir.  Bu  satrlar  Erkin  Vohidovga 

tegishli  va  qadah  bu  ishq  intihosida  vahdad  mayiga  sezilgan  tashnalik  ehtiyojini 

ifodalaydi:  

 

Sun qadah, bergil manga jonim haqin, ey piri dayr. 

 

Kim qadahlar zarbidan, chiqsin chaqin, hey piri dayr. 

 

Bormu Erkinga ul Ustoddin yaqin, ey piri dayr. 

 

Barq etar bahri fano, g‗am zavraqin, ey piri dayr. 

 

Ilkiga chunki Navoiy boda kishti sin olur. 

Ikki  buyuk  ijodkor  tomonidan  yaratilgan  ikki  san`at  –  she`riyat  va 

qo‗shiqchilik  bobidagi  fikrlarimizni  muxtasar  qilib  aytmoqchimizki,  Erkin 

Vohidovning  butun  hayot  yo‗li,  ijodi  mumtoz  adabiyotga  daxldor  bo‗lib,  uning 

shoh  asarlari  aruz  san`ati  shodasida  bitta  marjon  bo‗lib  yal-yal  tovlanmoqda. 

Mumtoz she`riyat uning asarlarini musiqa ustalariga oshno qildi va natijada o‗lmas  

qo‗shiqlar dunyoga keldi. 

 

San`atga baxsh umrning ajib mo‗'jizasi bor, 

 

U dunyoni tark etsa, undan dunyo qoladi. 

 

Odam umri sarhadli, qo‗shiq umri poyidor, 

 

Navosoz yuraklarda o‗lmas navo qoladi. 

Buyuk shoirning Yunus Rajabiy xotirasiga bitgan mana shu to‗rtlikni uning 

o‗ziga ham bemalol tadbiq qilsak, bo‗ladi. Zero, undan ham ming-minglab navosoz 

yuraklarda o‗lmas navo qoldi.