Ўзбекистон республикаси олий ва ўрта таълим вазирлиги самарканд иқтисодиёт ва сервис институти “магистратура” булими

КИРИШ
Курс иши мавзусининг долзарблиги. Бозор иқтисодиёти негизида, маълумки, товар-пул муносабатлари ётади. Ушбу муносабатларнинг пировард натижаси бўлиб аҳолини истеъмол товарларига бўлган талабларини тўлиқ қондириш, шу асосда уларнинг турмуш тарзи ва ҳаёт сифатини яхшилаш ҳисобланади. Мазкур мақсадга эришиш, бир томондан ишлаб чиқариш соҳасини, иккинчи томондан эса ишлаб чиқарилган неъматларни истеъмолчиларга етказиб берувчи хизмат кўрсатувчи соҳаларни жадал ривожлантиришни тақоза этади.
Таъкидлаш жоизки, олиб борилаётган чуқур ислоҳотлар натижасида республикамизда иқтисодиётнинг барча тармоқ ва соҳаларида йилдан йилга юқори ўсиш суръатларига эришилмоқда. Чунончи, 2016 йилда ялпи ички маҳсулотнинг ўсиш суръатлари 8%ни, саноатда 6.6%ни, қишлоқ хўжалик маҳсулотлари ишлаб чиқариш 6,8%ни, хизмат кўрсатиш ҳажми 12.5%ни, қурилиш ишлари ҳажми 16,6%ни, чакана савдо обороти 14,4 фоизни ташкил этди.¹
Республикамиз Президенти Ш.М. Мирзиёевнинг 2017 йил 7 февралдаги «Ўзбекистон Республикасини янада ривожлантириш бўйича ҳаракатлар стратегияси тўғрисида» 4947-сон фармони билан «2017 - 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси» тасдиқланди. Ушбу давлат дастури жаҳон ҳамжамиятлари томонидан “жадал ривожлантиришга қаратилган янгича миллий модел” сифатида эътироф этилди.
Ҳар қандай давлатда миллий иқтисодиётни савдосиз ривожлантириб бўлмайди. Айнан ушбу тармоқ саноат ва ишлаб чиқаришнинг турли соҳаларида яратилаётган товар-моддий бойликларни уларнинг истеъмолчиларига етказиб беришда асосий ролни ўйнайди. Савдосиз жамиятда “ишлаб чиқариш-муомала-истеъмол” занжири узвийлигини, товар-пул муносабларини изчил ва жадал ривожлантириб бўлмайди. Айнан шундай боғлиқлик кишилик жамиятида савдо соҳасини, унга кирувчи барча бўғинларни, чунончи товарларни катта партияларда сотишга ихтисослашган улгуржи савдо субъектлари фаолиятини жадал ривожлантиришни устувор вазифалардан бири этиб қўяди. Ушбу устувор вазифани бажариш мазкур соҳа субъектларида бошқарув механизларини, чунончи бухгалтерия ҳисоби ва аудитни замон зайлига мос равишда ташкил қилиш, уларни изчил равишда такомиллаштириб боришни тақоза этади. Ушбу ва бошқа заруратлар савдо корхоналарида бухгалтерия ҳисоби ва аудит масалаларини чуқур тадқиқ этишни долзарблигидан ҳам дарак беради.