Ўзбекистон республикаси олий ва ўрта махсус таълим вазирлиги тошкент давлат иқтисодиёт университети туризм асослари

11.2. Хизматларни стандартлаштириш ва сертификатлаштириш

Ўзбекистонда ҳам туристик хизматлар стандартлаштирилади ва сертификатлаштирилади. Бу иш Ўзбекистон метрология ва стандартлаштириш маркази ва "Ўзбектуризм" МК томонидан амалга оширилади. Бунда доимо бош талаб хавфсизликдир. Маҳсулот ёки хизматни сертификатлаштириш берилган маҳсулот ёки хизмат турига бўлган талаблар асосида амалга оширилади. Булар тартибга туширилган ва кераклича ўрнатилган қоидалар мажмуаси - стандартлар, қоидалар, талаблардир. Давлат, соҳа, идоравий стандартлар қатъий ҳисобланади, шунингдек, қоидалар, талаблар, тавсиялар ва бошқа меъёрлар учраб туради.

Маҳсулот ёки хизматнинг стандартлар, талаблар ёки қоидаларга мос келишини текшириш мажбурий ёки ихтиёрий бўлиши мумкин. Мажбурий сертификатлаштириш қонунчилик орқали ўрнатилади. Ўзбекистон республикасининг "Туризм тўғрисида"ги қонунида туристик маҳсулотни мажбурий сертификатлаш ёзиб қўйилган.
Мазкур қонун бўйича туристик маҳсулот - турга бўлган ҳуқуқдир. Бинобарин, қонунга асосан ҳуқуқни сертификатлаштириш зарур бўлади, бунга эса ҳали жаҳонда ҳеч ким ўрганмаган. Шундай бўлса ҳам, агар хуқуқни сертификатлаштириб бўлмасликдан диққатни бошқа томонга бурсак, барча хизматлар сифатини ҳам баҳолаш етарли даражада оддий эмаслиги кўриниб қолади.
Ўз - ўзини бошқариш тизими, масалан, уюшмалар, иттифоқлар ва бошқа жамоатчилик ташкилотлари, меҳмонхоналар бирлашмалари ўзларининг хусусий хизмат кўрсатиш стандартларини ўрнатадилар, улар фақат мазкур бирлашма қатнашчиларига тегишлидир. Халқаро АККОР меҳмонхоналар тизими турли мамлакатлардаги 1100 дан ортиқ меҳмонхоналарни бирлаштиради, лекин бу тизимдаги меҳмонхоналарнинг барчаси меҳмонларга хизмат кўрсатишнинг ягона стандартига бўйсунадилар, ягона фирма услубини қўллайдилар. АККОР тизимининг махсус органи кўрсатилаётган хизматларнинг ягона стандартга мувофиқлигини текшириб туради.
Республикамизда туристик хизматлар кўрсатувчи туроператор ва турагентликлар, меҳмонхона ва транспорт ташкилотлари, овқатлантириш ва экскурсияларни ташкил этувчи корхона - ташкилотларни мажбурий сертификатлаштириш тизими яратилган.