Ўзбекистон республикаси олий ва ўрта махсус таълим вазирлиги тошкент давлат шарқшунослик институти

Гурзибон Бхим образи. Пандуларнинг учинчиси. Тўрт ўғил ичида энг гавдалиси. Шу боис унинг исми ҳам жисмига монанд қилиб «Бхим», яъни «Кучли» деб қўйилган. Турли хил ёвуз кучлар билан ўрмонда курашишда қаҳрамонликлар кўрсатган. Энг яхши гурзибонлардан ҳисобланади.
Кенжа пандузодалар Накул ва Сахдев образи. Булар Пандунинг иккинчи аёлининг фарзандлари. Улар асар давомида уч пандузодаларга яхши ёрдамчи сифатида қатнашадилар.
Пандулар онаси Кунти образи. Пандунинг биринчи аёли. Ақл-заковатда тенги йўқ маликалардан. Унинг покдомонлиги шундан маълумки, у қиз бола вақтида унга маъбудлар меҳр қўйиб бир дуо мустажоб қилганларки, уни ўқиган қиз маъбудлардан куч - қудрат ва ақл-заковатда тенги йўқ бўлган фарзанд кўра олган. Кунти эри Пандунинг ўрмонда авлиё қарғишига қолиб фарзанд кўра олмаганидан кейин ўзи ўрганган дуоси ёрдамида маъбудлардан уч фарзанд кўради. Ўз дуосини кундошига ҳам ўргатиб, унинг ҳам икки ўғил кўришига ёрдам беради. Асарда ўта ақлли она ва меҳрибон келин образида яратилган.
Пандулар умр йўлдоши Драупади образи. Пандузодаларнинг аёли. Бу аёлни улар ўз қаҳрамонликлари эвазига ютиб олганлар ва барча ака-ука учун у бирдек хизмат кўрсатиб юради. Жуда гўзал ва ақлли аёл бўлган. Малика Драупадини курузодалар пандузодалардан қиморда ютиб олиб кўпчилик орасида уни шармандаларча ечинтирмоқчи бўлганларида у ўз дуолари билан Кришна маъбудига мурожаат қилиб ўзини унинг ҳимоясига топширади. Кришна эса барчанинг кўз олдида ўз куч-қудратини, ҳамда қизнинг эътиқодини намойиш этиш мақсадида унинг дуоларини қабул қилиб бу шармандаликдан уни сақлаб қолади.
Ёвузлик тимсоли Шакуни образи. Курузодаларнинг тоғаси бўлиб, эпосда барча ёвузликларнинг сабабчиси қилиб кўрсатилган. Курузодаларни пандузодаларга душман қилиб тарбиялашда ҳам унинг ҳиссаси жуда катта бўлган. Доим Дурйодханни онгини заҳарлаб, пандузодаларга қарши турли хил найранглар ўйлаб топишда кўмаклашиб юради.