Ўзбекистон республикаси олий ва ўрта махсус таълим вазирлиги самарқанд давлат тиббиёт институти

Тадқиқотнинг амалий натижалари қуйидагилардан иборат:
тадқиқ этилаётган дискурсив бирликларнинг прагматик вазифасини аниқлаш бўйича таҳлил қилиш ва тавсифлаш усуллари ишлаб чиқилган;
инглиз ва ўзбек тилларида шифокор ва беморнинг амалий мулоқоти ҳамда бадиий адабиётлардан тўпланган мисоллар таҳлили натижасида аниқ маълумотлар олинган.
Ишнинг амалий натижалари лингвомаданиятшунослик, социолингвистика, прагмалингвистика, коммуникатив тилшунослик курсларидан ўқув қўлланмалар ёзиш ва ўқув-услубий тавсияномалар тузишда қўл келади, шунингдек, инглиз тилини ўқитиш амалиётига доир махсус курсларда мулоқот тизимини ўрганиш усуллари ишлаб чиқилган.
Тадқиқот натижаларининг ишончлилиги замонавий тилшунослик доирасида қўлланиладиган метод ва назарий манбалардан фойдаланиш, коммуникатив тилшунослик, социолингвистика, прагмалингвистика фанларида шаклланган назарий қарашлар ёрдамида масалани ҳал қилишга мурожаат қилган ҳамда амалий нутқ таҳлиллари билан асосланади. Шунингдек, чиқарилган хулосаларнинг қатъийлиги, қўлланилган ёндашув ва методлар ҳамда уларнинг назарий асослари магнит лентага ёзиб олинган мулоқот жараёни таҳлили билан мувофиқлиги орқали исботланган.
Тадқиқот натижаларининг илмий ва амалий аҳамияти. Тадқиқот натижаларининг илмий аҳамиятини тиббий мулоқот мазмуни шаклланиши ва мулоқот муҳитида тиббий дискурснинг воқеланиши, прагмалингвистик таҳлил ва коммуникатив тилшунослик йўналишлари доирасида ўрганишдан иборат. Тиббий нутқ ифодасининг прагматик вазифаларини ажратиш ва функционал-семантик ифодасини белгилаш, тиббий мулоқот жараёни самарасини таъминловчи лисоний ва нолисоний омилларнинг ифода воситаларини англашга ёрдам беради.
Тадқиқотнинг амалий аҳамияти унинг натижаларидан инглиз ва ўзбек тиббий мулоқот тизимидаги формал ва лингвомаданий тил бирликларини таҳлил қилган ҳолда прагмалингвистика, матн тилшунослиги, социолингвистика соҳалари бўйича махсус семинарлар ташкил қилиш, тил таълими амалиётида, тиббиёт ўқув юртлари учун инглиз тили адабиётларининг янги авлодини тайёрлашда кенг фойдаланиш мумкинлиги билан изоҳланади. Бундан ташқари, тадқиқот материали тиббиёт ходимларининг коммуникатив компетенцияни ривожлантиришда, тиббиёт олий ўқув юрти талабаларининг бемор билан мулоқот қобилиятини ўстиришда хизмат қилиши билан белгиланади.