Ўзбекистон республикаси олий ва ўрта махсус таълим вазирлиги самарқанд давлат тиббиёт институти

Диссертация тадқиқотининг диссертация бажарилган олий таълим ёки илмий-тадқиқот муассасасининг илмий-тадқиқот ишлари режалари билан боғлиқлиги. Тадқиқот Самарқанд давлат тиббиёт институти хорижий тиллар кафедрасининг «Тил ўқитишда лексик-грамматик тизим ва мулоқот жараёни» мавзусидаги илмий-тадқиқот режаси доирасида бажарилган.
Тадқиқотнинг мақсади тиббий дискурсда прагматик мазмунини шакллантирувчи лисоний бирликларнинг миллий-маданий имкониятларини ўрганишдан иборат.
Тадқиқотнинг вазифалари: тиббий дискурснинг прагматик мақомини белгилаш ва унинг таркибини шакллантирувчи лисоний бирликларни аниқлаш;
тиббий мулоқотни алоҳида мулоқот тури сифатида амал қилиш вазифалар кўламини ўрганиш;
тиббий нутқни ижтимоий-маданий воқеланишини таъминловчи лисоний воситаларнинг таркибини белгилаш;
тиббий нутқ доирасидаги лисоний воситаларнинг прагматик мазмунини ва фаоллашувини қиёсий таҳлил қилиш.
Тадқиқот объектини инглиз ва ўзбек тиллари тизимида тиббий дискурс мазмунининг шаклланиши ва ижтимоий-маданий ҳамда лингвомаданий жиҳатлари таҳлили ташкил қилади.
Тадқиқот предмети тиббий мулоқот шаклларининг нутқий тузилма таркибида намоён бўладиган семантик, прагматик ва коммуникатив жиҳатлари ҳисобланади.
Тадқиқотнинг усуллари. Диссертацияда қуйидаги тадқиқ ва таҳлил усулларига мурожаат қилинди: тавсифлаш методи, қиёслаш ва мантиқий умумлаштириш усуллари, компонент таҳлили, прагма-семантик таҳлил;
Тадқиқотнинг илмий янгилиги қуйидагилардан иборат:
тиббий дискурсда нутқий тузилмалар ифодалайдиган прагматик мазмун ва вазифа таҳлили, уларни англатувчи тил бирликлари илк бора тадқиқ этилган;
тиббий нутқ ижтимоий-маданий ҳодиса сифатида нутқий тузилмалар қаторига қўйилиши исботланган;
тиббий мулоқотнинг лингвомаданий, лисоний-прагматик ҳамда дискурсив қоида-қонуниятларига амал қилиши далилланган;
тиббий дискурс мазмунни шакллантирувчи лисоний бирликларнинг коммуникатив ифода тури мавжудлиги исботланган ва ушбу турда иштирок этадиган лисоний бирликларнинг функционал жиҳатлари белгиланган;
тиббий мулоқот жараёнида иштирок этувчиларнинг формал, лингвомаданий, ижтимоий муносабатлари ўрганилиб, уларнинг нутқда фаоллашиш шартлари аниқланган.