Ўзбекистон республикаси олий ва ўрта махсус таълим вазирлиги самарқанд давлат тиббиёт институти

Тадқиқотнинг республика фан ва технологиялари ривожланишининг устувор йўналишларига мослиги. Мазкур тадқиқот республика фан ва технологиялари ривожланишининг I.«Ахборотлашган жамият ва демократик давлатни ижтимоий, ҳуқуқий, иқтисодий, маданий, маънавий-маърифий ривожлантиришда инновацион ғоялар тизимини шакллантириш ва уларни амалга ошириш йўллари» устувор йўналишига мувофиқ бажарилган.
Муаммонинг ўрганилганлик даражаси. Дискурс ҳодисасининг турли сатҳларда намоён бўлиши, унинг мулоқот жараёнининг муҳим бирлиги сифатида таҳлил доираси тадқиқи тилшунослар диққатини доимо жалб қилиб келмоқда. Шу ўринда А.А. Кибрик, В.А. Плунгян (1997), Дейк ван Т. (1989), Ш. Сафаров (2018), Г.Л.Золотова (2007), А.Вежбицка (1997), Н.Маҳмудов, А.Нурмонов (1995), Р.Р.Сайфуллаева ва бошқалар (2010), Дейк ван Т.А. (1999), Д. Таннен (1989), С. Левинсон (1983), Дж. Гумперц (1982) кабилар олиб боришган изланишларни алоҳида қайд этиш керак. Айниқса, дискурсда нутқий тузилмаларнинг талқинида прагмалингвистик ёндашувнинг тараққий этиши коммуникатив мазмун ифодаси масаласига эътиборнинг янада кучайишига сабаб бўлди (И.П. Сусов, 1980; В.Е. Чернявская, 2001; Г.Г. Почепцов 1989; В.З. Демьянков, 2002; Е.И. Голованова, 2013; В.И. Карасик, 2004; Т.А. Ширяева, 2006; Д. Шиффрин, 2006 г.; Дж. Грегори, С. Миллер, 1998; Д.Кьяро, 1996 ва бошқалар).
Дискурс таҳлилида маълум соҳага тегишли бўлган нутқ ва мулоқот назариясининг ривожи эса, ўз навбатида, дискурс мазмунини турли нутқий мулоқот вазиятида шакллантирувчи ва коммуникатив вазифа ижросини таъминловчи бирликларни тавсифлаш ва таснифлаш муаммосини долзарблаштирди. Шу жумладан, тиббий дискурс мазмунини воқелантиришдаги мулоқот турлари ҳам кенг ўрганилмоқда (Сидорова, Н.Ю.2008; Календр, А.А. 2015; Жура, В.В. 2013; Т.Г. Добросклонская, 2000; М.Култхард, М.Эшби, 1976; С. Фишер, 1993; Г. Л. Крепс, 1988; Т. Томпсон, 1998 г.; П. Ф. Вейцман, Э. А. Вейцман, 2003; Х. Вайцкин, Т. Бритт, 1989; Р. Уэлч Клайн, 2003 г.; Л. Ройстер, 1990).
Бироқ тиббий дискурсда мулоқот иштирокчиларининг роли (шифокор ва бемор), тиббий дискурсда миллий-маданий тавсифи, мулоқот жараёнининг прагматик мазмуни (дарак, буйруқ, савол) билан бир қаторда, мулоқот этикети, тиббий формал мулоқот усулларининг қиёсий типологик таҳлил қилиш зарурати мавжуд.