Ўзбекистон республикаси Олий ва ўрта махсус таълим вазирлиги Мирзо Улуғбек номидаги Самарқанд Давлат архитектура-қурилиш институти «Қурилиш материаллари, буюмлари ва конструкцияларини ишлаб чиқариш»

Ярим қуруқ пресслаш усули. Бу усулда хом ашёлар аввал қуритилади, майдаланади, тегирмонларда эзилади. Сўнгра ҳосил бўлган кукунсимон ашё аралаштирилиб сув ёки буғ ёрдамида намланади. Буғ билан ишлов берганда гилтупроқнинг хоссалари яхшиланади, гил зарралари кўпчийди, яхши қолипланади. Бу усулда сопол масса кукун ҳолида бўлиб, унинг намлиги ярим қуруқ пресслаш усулида 8-12% ва қуруқ пресслаш усулида 4-6% бўлади. Шунинг учун бундай сопол массалардан тайёрланадиган буюмлар махсус прессларда юқори босим (1540 МПа) остида қолипланади. Бу усулда прессланган буюмларни қуритмасдан тўғри пишириш мумкин. Бунда ишлаб чиқариш жараёни тезлашади, ёқилғи кам сарф бўлади. Пресслаш усулининг яна бир афзаллиги шундаким, сопол масса тайёрлаш учун кам пластик тупроқларни ҳам ишлатиш мумкин. Ярим қуруқ пресслаш усули билан оддий пишиқ ғишт, ичи бўш ғишт ва тошлар, пардозбоп тахталар қолипланади. Қуруқ пресслаш усули эса зич сопол буюмлар - пол учун тахтачалар йўл учун ишлатиладиган ғишт, чинни буюмлар олишда ишлатилади.



6.3-расм. Пластик қолиплаш усули билан сопол ғишт олиш ва ундан буюмлар ишлаб чиқариш технологик тизими: 1 – эксковатор; 2 – вагонлар; 3 – яшикли таъминлагич; 4 – бегунлар; 5 – валикли майдалагич; 6 – аралаштиргич; 7 – лентали пресс; 8 – қирқиш ускунаси; 9 – хом ғиштни вагонга териш мосламаси; 10 – хом ғишт ортилган вагонлар; 11 – қуритиш камералари; 12 – қуриқ ғишт ортилган вагон; 13 – тунелли хумдон; 14 – юклагич; 15 – ғиштни намлаш; 16 – ғишт блокларини тайёрлаш мосламаси; 17 – блокларни қотириш камераси; 18 – ғиштли панелларни тайёрлаш мосламаси; 19 – панелларни қотириш.



6.4-расм. Лентали пресснинг тузилиши: 1 - мундштук; 2 - пресснинг боши; 3 - цилиндр; 4 - бурама (шнек); 5 - воронка.


Қуйма (шликер) усули. Бу усулда олдиндан майдаланган хом ашё сув қўшиб яхшилаб аралаштирилади. Сув миқдори 40% гача бўлиб, аралаштириш натижасида бир хилдаги қуюқ оқувчан масса (шликер) ҳосил бўлади. Шликерни қолипларга қуйиб ҳар хил шаклдаги буюмлар олиш мумкин. (Масалан, чинни ёки фаянсдан қилинган мураккаб шаклдаги буюмлар - ванналар, унитазлар, раковиналар ва ҳ.к.) Бундан ташқари шликерни сочилувчан қуритиш минораларида қуритиб пресс-порошоклар олинади, булар пардозбоп юпқа сопол тахтачалар олишда ишлатилади.